Җиденче бүлек. Ватанны саклаучылар көне Тема. Без - солдатлар

Бурычлар:

1) балаларны Ватанны саклаучылар көне белән таныштыру, очкычның (самолет), вертолетның өлешләрен, формасын аерырга һәм атарга өйрәтүне, исемнәрне сыйфатлар белән яраклаштыру күнекмәләре формалаштыруны дәвам итү, солдат, очучы, диңгезче, очкыч, вертолет, кораб сүзләре хисабына сүзлекне активлаштыру;

2) балаларның игътибарын, хәтерен, кызыксынуын үстерү;

3) балаларда очучы, диңгезче, хәрбиләр һөнәренә хөрмәт, патриотик хисләр, малайларда көчле, кыю булу теләге тәрбияләү.

Җиһазлар: Гариф Нигъмәтҗанов көенә, Шамил Маннапов сүзләренә язылган “Солдата буган диләр” җырының аудиоязмасы, кызлар тарафыннан малайлар өчен алдан әзерләгән бүләкләр, мольберт, А4 форматында аерым самолет һәм вертолет, кораб рәсемнәре, клей, һәр бала санынча А5 форматындагы кәгазь битләре, кораб ясау өчен төсле кәгазьләр.

Эшчәнлек барышы.

Гариф Нигъмәтҗанов көенә, Шамил Маннапов сүзләренә язылган “Солдатта буган диләр” җырының аудиоязмасының бер өлеше яңгырый

Тәрбияче. Кадерле балалар, барыгызга да матур көн телим! Балалар, бу нинди матур җыр яңгырый? Ни өчен безнең бүлмәбез шундый матур итеп бизәлгән икән? Ничек уйлыйсыз? (Бүген әтиләр бәйрәме). Дөрес, бүген әтиләр бәйрәме. (Активлаштыру). (Индивидуаль һәм күмәк кабатлаулар). Балалар, 23 нче февраль көнне безнең илебез Ватанны саклаучылар бәйрәмен билгеләп үтә. Бу көнне солдатларны, командирларны, безнең әтиләрне, бабаларыбызны – барлык Ватанны саклаучыларны, армиядә хезмәт итүчеләрне котлыйлар. Ә тагын безнең төркемдәге малайларны – булачак ил сакчыларын да котлыйбыз. (Кыз балаларны активлаштыру). Малайлар, барыгыз да басыгыз әле. Сезне чын күңелдән Ватанны саклаучылар көне белән котлыйбыз. Сәламәт, кыю, батыр, көчле булып үсегез! Бездән кечкенә генә бүләкләр кабул итеп алыгыз.

Кызлар алдан әзерләгән бүләкләр тапшыралар.

Тәрбияче. Балалар, Ватанны саклаучылар нинди булырга тиеш? (Индивидуаль һәм күмәк җаваплар). Дөрес, балалар, алар көчле, кыю, гадел, үз сүзендә тора белүче булырга тиеш. Әйдәгез, бергәләп кабатлыйк: көчле, кыю, гадел, үз сүзендә тора белүче. (Балаларны активлаштыру). Малайлар, ә сезнең көчле, кыю, гадел, үз сүзендә тора белүче буласыгыз киләме? (Индивидуаль һәм күмәк җаваплар). Булдырдыгыз балалар! Балалар, әйдәгез сезнең белән өйрәнгән “Солдатта булган диләр” җырын җырлыйк.

Солдатта буган диләр.

Музыка: Гариф Нигъмәтҗанов

Сүзләре: Шамил Маннапов

Билен кысып буган, диләр,

Бигрәк уңган, диләр;

Әллә каян күренеп тора —

Солдатта булган, диләр.

Кечеләрне кече итәр,

Олыны зурлар, диләр.

Әллә каян күренеп тора —

Солдатта булган, диләр.

Комбинезон алган, диләр,

Шинелен салган, диләр.

Шинелен салса да солдат,

Гадәте калган, диләр.

Тәрбияче. Балалар, булдырдыгыз! Менә солдатлар нинди була икән! Ә хәзер бер табышмакка җавап табыгыз әле.

Канаты бар – җилпеми,

Эче җылы – җил тими.

Корыч йөрәкле кош ул,

Безнең яраткан дус ул. (Самолет). Дөрес, балалар.

Тәрбияче мольбертка самолет һәм вертолет рәсемнәрен куя.

Тәрбияче. Балалар, бу рәсемнәрдә сез нәрсә күрәсез? (Очкычлар (самолет), вертолет). (Активлаштыру). Балалар, әйдәгез бу рәсемнәрне карыйк әле. Бу очкычның (самолетның) нәрсәсе? (Кабинасы) (Активлаштыру). Очкыч (самолет) кабинасында кем утыра (Очучы утыра). (Активлаштыру). Очкычның (самолетның) кошларныкы кебек нәрсәсе бар? (Канатлары бар). (Активлаштыру). Ә монысы очкычның (самолетның) нәрсәсе? (Койрыгы). (Активлаштыру).. Булдырдыгыз! Ә хәзер бу рәсемне карыйк. Бу нәрсә? (Вертолет). (Активлаштыру). Бу нәрсә? (Кабина) (Активлаштыру). Вертолет кабинасында кем утыра? (Очучы утыра). (Активлаштыру). Вертолетның кошларныкы кебек нәрсәләре бар? (Канатлары бар). (Активлаштыру). Ә монысы вертолетның нинди өлеше? (Койрыгы). Балалар, вертолет белән очкыч (самолет) охшаганнармы? (Балаларның җаваплары). (Активлаштыру). Әйе, алар охшаганнар, ләкин аларның аермасы да бар. Нинди аерма икән? (Балаларның җаваплары). (Активлаштыру). Әйе балалар, очкычтан (самолеттан) аермалы буларак, вертолетның пропеллере бар. Әйдәгез, бергә кабатлыйк: пропеллер. (Балаларны активлаштыру). Балалар, безнең илебезнең һава чикләрен очкычлар (самолетлар) һәм вертолетлар белән саклыйлар. Очкыч (самолет) һәм вертолет йөртүчеләрне ничек атыйлар? (Очучылар). (Активлаштыру). Очучылар сәләмәт, кыю, акыллы булырга тиешләр. Әйдәгез, сез дә очучылар булырсыз, уйнап алабыз. Очучылар! Очкычларга (самолетларга), вертолетларга “утырыгыз”! (Балалар кулларын ике якка сузып “очкыч” булып “очалар”). Булдырдыгыз! Балалар, мин сезгә бер шигырь укыйм.

Тасмалы фуражкасы

Бик килешә үзенә,

Ә якасы охшаган

Матур зәңгәр күзенә.

Кызыл флотчы абый

Бүген бездә ял итә.

Иртәгә хезмәтенә –

Ерак диңгезгә китә. Кем турында икән бу шигырь? (Балаларның җаваплары). Әйе, балалар, монда сүз диңгезче турында бара. Балалар, диңгезчеләр диңгез чикләрен саклыйлар. Бергәләп кабатлыйк: диңгезчеләр диңгез чикләрен саклыйлар. (Балаларны активлаштыру). Диңгезләрдә, океаннарда су өстендә һәм су астында хәрби корабларда диңгезчеләр илебезне саклыйлар. Балалар, әйдәгез без дә сезнең белән кораблар ясыйк. (Тәрбияче кораб рәсеме күрсәтә). Балалар, бу рәсемдә сез нәрсә күрәсез? (Кораб). (Балаларны активлаштыру). Балалар башта корабның көймә өлешен ябыштырабыз, менә ул. Ә монысы җилкәне. Ә иң очына флаг ябыштырырбыз. (Төсле кәгазьләрдән ябыштырып кораблар ясыйлар). Булдырдыгыз балалар! Эшләрегез бигрәк матур булды, без аларны әтиләргә, бабайларга, абыйларга бүләк итәрбез. Балалар, барыгыз да кулга кул тотынып түгәрәккә басыгыз, кулларыгызның җылысын бер-берегезгә бүләк итегез. Бер-берегезгә карап елмаегыз, сәламәтлек теләгез! Булдырдыгыз, балалар! Без бүген солдатлар, очучылар, диңгезчеләр турында күп нәрсә белдек. Мин сездән бик канәгать! Рәхмәт сезгә!