Тема. Кар бабай

Бурычлар:

1). балаларның кышкы күренешләр турындагы күзаллауларын киңәйтү, геометрик фигураларның – түгәрәкнең, өчпочмакның атамасын ныгыту, детальләрне зурлыгы буенча чагыштырырга өйрәтүне дәвам итү;

2). балаларның кабул итүләрен, игътибарын, фикерләвен үстерү;

3). балаларда уңай эмоциональ халәт булдыру, эстетик хисләр тәрбияләү.

Җиһазлар: “тылсымлы тартма”, аның эчендә: хат, җиләк, чана, кар бабай, гөмбәләр, чәчәкләр, панама, кышкы башлык, бияләйләр рәсемнәре (аерым), П. Чайковскийның «Детский альбом» сериясеннән «Январь» әсәренең аудиоязмасы

Эшчәнлек барышы

Тәрбияче. Балалар, хәерле көн! Кәефләрегез ничек? (Индивидуаль һәм күмәк җаваплар). Балалар, урамда суыкмы, әллә җылымы? (Индивидуаль һәм күмәк җаваплар). Әйе суык, ни өчен икән? Хәзер елның кайсы вакыты? (Кыш). (Индивидуаль һәм күмәк җаваплар). Урамда кыш икәнен каян белергә мөмкин? (Индивидуаль һәм күмәк җаваплар). Әйе, урамда ап-ак кар, көннәр суык. Сез кыш көне урамда йөрергә яратасызмы? (Балаларны активлаштыру). (Индивидуаль һәм күмәк җаваплар). Ни өчен? (Индивидуаль һәм күмәк җаваплар). Кыш көне сез урамда нинди уеннар уйныйсыз, нишлисез? (Индивидуаль һәм күмәк җаваплар). Балалар, ә кардан сез нәрсәләр ясыйсыз? (Кар бабай). (Индивидуаль һәм күмәк җаваплар). Булдырдыгыз, балалар! Балалар, бүген без сезнең белән кар бабайның рәсемен ясарбыз. Балалар, ул нинди өлешләрдән, фигуралардан тора? (Индивидуаль һәм күмәк җаваплар). Әйе балалар, ул түгәрәкләрдән тора. Зурлыклары буенча ул түгәрәкләр бертөрлеме? (Юк). (Индивидуаль һәм күмәк җаваплар). Әйе, башта кечкенәрәк түгәрәкне ясыйбыз, аннан соң зуррагын, аннан соң иң зурысын ясыйбыз. Балалар, кар бабайның күзләрен нинди төс белән, ничек итеп ясыйбыз? (Индивидуаль һәм күмәк җаваплар). Әйе, аның күзләре ике кечкенә түгәрәктән тора. Ә борынын ничек ясыйбыз? (Индивидуаль һәм күмәк җаваплар). Дөрес, балалар, кар бабайның борыны кызыл төстәге кечкенә өчпочмактан тора. Ә хәзер матур музыка астында кар бабайны үзегез ясап карагыз.

Балалар үрнәк буенча кар бабай рәсеме ясыйлар. Шул вакыт П. Чайковскийның «Детский альбом» сериясеннән «Январь» әсәренең аудиоязмасы яңгырый.

Тәрбияче. Балалар, рәсемнәрегез бигрәк матур булган, кич белән әти-әниләрегезгә күрсәтербез. Балалар, сез рәсем ясаганда Йомшаккай бер “тылсымлы тартма” калдырды. Әйдәгез тартманы ачып карыйк әле. Балалар, монда бик күп рәсемнәр, янында хаты да бар. (Тәрбияче хатны укый). Әйдәгез хатны укыйк әле: “Исәнмесез, балалар! Минем сезгә зур үтенечем бар иде. Мин сезгә рәсемнәр җибәрәм. Ул рәсемнәрдә төрле прдметлар ясалган, ләкин мин аларның кайсы кыш темасына туры килүен белмим. Ярдәм итсәгез иде. Зур рәхмәт әйтеп, Йомшаккай”. Балалар, Йомшаккай бигрәк тәрбияле, ул ягымлы сүзләр белән хат язып җибәргән, аңа булышабызмы? (Балаларның җаваплары).

Тәрбияче балаларга җиләк, чана, кар бабай, гөмбәләр, чәчәкләр, панама, кышкы башлык, бияләйләр рәсемнәре күрсәтә.

Тәрбияче. Балалар, бу рәсемнәрнең кайсысы кыш фасылына туры килә? (Чана, кар бабай, кышкы башлык, бияләйләр). (Индивидуаль һәм күмәк җаваплар). Булдырдыгыз балалар! Йомшаккай бик сөенер, сезгә рәхмәт әйтер. Балалар, без сезнең белән нәрсәләр турында сөйләштек? Сезгә ошадымы? (Индивидуаль һәм күмәк җаваплар). Булдырдыгыз балалар! Әйдәгез башлыкларны, бияләйләрне, итекләрне киеп, чаналарны алып урамга чыгабыз.