Тема. Яңа ел уенчыклары.

Бурычлар:

1) балаларны Яңа ел бәйрәмен каршыларга әзерләү, чыршы уенчыклары белән таныштыру, пыяладан ясалган уенчыкларның, предметларның билгеләрен ачыклау (үтә күренмәле, төсле, шома, салкын, ватылучан);

2) балаларның сенсор сәләтләрен һәм кызыксынуын, күзәтүчәнлеген үстерү;

3) чыршы уенчыкларына сак караш тәрбияләү. .

Җиһазлар: тартма, төрле төстәге, зурлыктагы, формадагы чыршы уенчыклары, пыяладан ясалган кечкенә предметлар (ислемай (духи) шешәләре, ут лампасы, савыт-саба, ваза, бокал һ.б.), пыяланың тавышын белү өчен таякчык, стакан. В. Вәлиева сүзләре һәм көенә язылган “Чыршыкай-матуркай” җыры аудиоязмасы.

Эшчәнлек барышы.

Тәрбияче кулына мишуралар белән бизәлгән тартма ала.

Тәрбияче. Балалар, бу нәрсә? (Серле тавыш белән). Әйе, бу тартма. Гади тартма түгел, ул тылсымлы тартма. (Тәрбияче тартманы акрын гына селкетә). Анда нәрсәдер бар! Тартма эчендә нәрсә бар икәнен белү өчен, аны ачып карарга кирәк. Алсу, кил әле, тартманы ач һәм андагы предметларны балаларга күрсәт. (Бала тартманы ача). Алсу, син нәрсә алдың? (Чыршы уенчыгы). Балалар, тылсымлы тартмада чыршы уенчыклары салынган. (Тәрбияче тартмадан уенчыкларны ала һәм күрсәтә). Бу чыршы уенчыклары түгәрәк формада, төрле зурлыкта, төрле төстә: кызыл, зәңгәр, сары, яшел. Ничек уйлыйсыз, бу уенчыкларны нинди материалдан ясаганнар икән? (Балаларны активлаштыру). Бу уенчыклар пыяладан ясалган. Пыяла уенчыклар. (Тәрбияче өстәлгә төсле һәм үтә күренмәле пыяладан ясалган предметлар тезә). Балалар, үтә күренмәле пыяладан ясалган нинди предметлар беләсез? (Тәрәзә, ут лампасы, шешәләр). (Балаларны активлаштыру). Төсле пыяладан ясалган нинди предметлар күрәсез? (Савыт-саба). (Балаларны активлаштыру). Балалар, өстәлдә яткан пыяла предметларны тотып карагыз әле. Алар нинди? (Шома, салкын). (Балаларны активлаштыру). Пыяла су үткәрми. Карагыз әле, хәзер мин тәҗрибә үткәреп карыйм. (Тәрбияче стаканга су сала). Су стаканнан агып чыктымы? (Юк). Стакан турында нәрсә әйтергә була? (Пыяла су үткәрми). (Балаларны активлаштыру). Балалар, суны пыяладан ясалган нинди савытларга салырга була? (Шешә, банка, чынаяк, ваза һ.б.). Пыяла төрле калынлыкта булырга мөмкин. Тәрәзәләрне, витриналарны калын пыяладан ясыйлар. Вазаларны, бокалларны нечкә пыяладан ясыйлар. (Балаларны активлаштыру). Ләкин, пыяла нинди калынлыкта булуына карамастан, тиз ватыла, шартлый. Шуңа күрә пыяладан ясалган предметларга карата бик сак булырга кирәк. Балалар, карагыз әле, мин махсус таякчык белән сак кына пыяла предметларга сугып чыгам. Тыңлагыз, пыяла нинди тавыш чыгара? (Яңгыравыклы, чылтырый). (Балаларны активлаштыру). (Тәрбияче балаларның игътибарын тартмадагы чыршы уенчыкларга юнәлтә). Балалар, тартмадагы чыршы уенчыклары нинди материалдан ясалган? (Пыяла). (Балаларны активлаштыру). Тиздән Яңа ел бәйрәме җитәчәк, без чыршыны шундый матур уенчыклар белән бизәрбез. Чыршыбыз матур, купшы булыр, ялтырап торыр. Хәзер аларны ватылмасын өчен тартмага салып куйыйк. (Балалар берәм – берәм килеп, уенчыкларны тартмага салалар). Булдырдыгыз! Әйдәгез, чыршы турында җыр тыңлыйбыз һәм биибез.

Тәрбияче В. Вәлиева сүзләре һәм көенә язылган “Чыршыкай-матуркай” җыры аудиоязмасын куя.