Тема. Минем Туган илем - рәсәй

Бурычлар:

1). балаларда туган ил, аның тарихы, флаг (әләм) турында күзаллаулар формалаштыру;

2). балаларның кабул итүләрен, сүзләрне, кыска фразаларны ачык әйтү осталыгын, игътибарын үстерү;

3). балаларда туган илгә мәхәббәт, төгәллек тәрбияләү.

Җиһазлар: интерактив такта, компьютер, проектор, Рәсәй тарихы турында слайдлар, Рәсәй флагы рәсеме, балалар санынча А5 форматындагы ак кәгазь битләре, ак, зәңгәр, кызыл төстәге кәгазь тасмалар.

Эшчәнлек барышы.

Ишек шакыган тавыш ишетелә.

Тәрбияче. Балалар, анда кем бар икән? (Ишекне барып карый, Йомшаккай керә). Безгә кем килгән? (Йомшаккай). (Индивидуаль һәм күмәк кабатлаулар).

Йомшаккай. Исәнмесез, балалар! (Балаларны активлаштыру).

Тәрбияче. Ни булды сиңа, Йомшаккай?

Йомшаккай. Мин бит мәктәптә укыйм. Миңа өй эше бирделәр, ә мин аны эшли алмыйм. Сез бит бик акыллы балалар, миңа ярдәм итә алмассызмы икән!

Тәрбияче. Әйдә биремеңне әйтеп кара, безнең балалар сиңа ярдәм итәрләр.

Йомшаккай. Миңа үзебезнең Туган илебез турында, Рәсәй, аның тарихы турында сөйләргә куштылар, ә мин бер нәрсә дә белмим.

Тәрбияче. Йомшаккайга ярдәм итәбезме? (Әйе). Мин сезгә Рәсәй турында сөйлим, сез игътибар белән тыңлагыз. (Сөйләгәндә информацион технологияләр кулланырга мөмкин). Безнең илебез бик борынгы. Безнең илебез ничек атала? (Индивидуаль һәм күмәк җаваплар). Дөрес, безнең Туган илебез – Рәсәй. (Индивидуаль һәм күмәк кабатлаулар). Бик күптән, кешеләр төркемнәр белән яшәгәннәр. Һәр төркемнең үз башлыгы булган. Безнең илнең дә үз башлыгы бар. Аны президент дип атыйлар. .(Индивидуаль һәм күмәк кабатлаулар). Безнең илебез – Рәсәйнең дә туган көне бар. 12 нче июнь – Рәсәй Федерациясенең туган көне. Бу бик зур бәйрәм. Балалар, бергә кабатлыйк әле: 12 июнь – Рәсәйнең туган көне. (Балаларны активлаштыру). Балалар, нинди илдә яшибез? (Рәсәй Федерациясендә, Рәсәйдә). (Балаларны активлаштыру). Дөрес, балалар, без Рәсәйдә яшибез. Булдырдыгыз! Балалар, уң кулыгызны күрсәтегез! Нинди матур сезнең уң кулыгыз! Уң кулыгызга сокланып карагыз! Сул кулыгызны күрсәтегез! Нинди матур сезнең сул кулыгыз! Уң кул бармаклары чиратлап сул кул бармаклары белән исәнләшәләр:

Саумы, кояш!

Саумы, һава!

Саумы, иртә!

Саумы, йомшак җил!

Саумы, Туган ил!

Тәрбияче. Йомшаккай, балалар, мин сезгә бер рәсем күрсәтәм.

Тәрбияче балаларга Рәсәй флагы (әләме) рәсемен күрсәтә.

Тәрбияче. Балалар, карагыз әле бу рәсемгә. Рәсемдә сез нәрсә күрәсез? (Флаг). (Балаларны активлаштыру). Балалар, әйе, бу рәсемдә безнең илнең флагы (әләме) сурәтләнгән. Һәрбер илнең, дәүләтнең үз әләме (флагы) бар. Безнең илнең дә флагы (әләме) бар. Балалар, флаг (әләм) нинди төсләрдән тора? (Ак, зәңгәр, кызыл). (Балаларны активлаштыру). Дөрес, бу төсләр һәрберсе нәрсә дә булса аңлата. Ак төс – бурычны, чисталыкны, зәңгәр – тугрылыкны, яратуны, кызыл – батырлыкны, көчне аңлата. Әйдәгез, балалар сезнең белән әләмнәр (флаглар) ясыйбыз. Сезнең алда ак, зәңгәр, кызыл кәгазь тасмалар, шуларны дөрес итеп, үрнәктәге кебек бер-бер артлы ябыштырабыз. (Балалар аппликация ясыйлар). Йомшаккай, менә балалар нинди матур флаглар (әләмнәр) ясадылар. Бу безнең илебезнең – Рәсәй флагы (әләме).

Йомшаккай. Рәхмәт сезгә, балалар! Мин бик күп нәрсәләр белдем, сез бик акыллы балалар. Сау булыгыз!