Дүртенче бүлек. Минем шәһәрем, минем Ватаным Тема. Минем данлыклы шәһәрем

Бурычлар:

1) балаларны туган шәһәр белән таныштыруны дәвам итү, шәһәрнең тарихы, Татарстан Республикасы турында белем бирү;

2) балаларның кабул итүләрен, игътибарын, диалоглы сөйләмен үстерү;

3) балаларда туган шәһәр белән горурлану хисләре, төзүче һөнәренә хөрмәт тәрбияләү.

Җиһазлар: шәһәр турында матур көй, мольберт, шәһәр күренеше сурәтләнгән рәсем, “Lego” төзү материаллары.

Эшчәнлек барышы.

Балалар алдында шәһәр сурәтләнгән рәсем.

Тәрбияче. Балалар, карагыз әле бу рәсемгә. Рәсемдә сез нәрсә күрәсез? (Йортлар, урам, автобус, кешеләр). (Балаларны активлаштыру). Балалар, бу рәсемдә безнең шәһәр сурәтләнгән. Безнең шәһәрнең исеме ничек? (Яр Чаллы). (Индивидуаль һәм күмәк кабатлаулар). Дөрес, без Яр Чаллы шәһәрендә яшибез. Яр Чаллы – матур шәһәр, шәһәрдә биек йортлар, киң урамнар, парк-скверлар күп. Безнең шәһәребез Татарстан Республикасында урнашкан. (Индивидуаль һәм күмәк кабатлаулар). Татарстан Республикасында шәһәрләр күп: Казан, Яр Чаллы, Алабуга, Түбән Кама, Бөгелмә, Әлмәт, Минзәлә һ.б. (Индивидуаль һәм күмәк кабатлаулар). (Ишек шакыган тавыш ишетелә). Балалар, кем икән ул?. (Тәрбияче ишекне ача, хат ташучы керә).

Хат ташучы. Исәнмесез, минем нәни дусларым! (Балалар исәнләшәләр). Мин сезгә безнең шәһәрне төзегән төзүчеләрдән хат алып килдем. Сез аны бергәләп тыңларсыз. Сау булыгыз.

Тәрбияче. Рәхмәт, Хат ташучы, сау бул! Балалар, бу хат гади хат түгел, әйдәгез, игътибар белән бергәләп тыңлыйк әле.

Аудиоязма яңгырый.

Исәнмесез, балалар! Без сезнең бүген шәһәребез турында сөйләшкәнегезне белдек һәм аның ничек төзелгәне турында сөйләргә булдык. Безнең шәһәребезнең тарихы бик кызыклы. Бик күптәннән бу җирләргә бер кеше килеп урнашкан. Ул юл салып, терлек асрап, иген игеп яши башлаган. Аны күреп тагын бүтән кешеләр килеп урнашканнар һәм кечкенә авыллар барлыкка килгән. “Чаллы” сүзе елга исеменнән алынган. Елга буена урнашканга күрә дә инде шәһәребез Яр Чаллы дип атала. Балалар, менә шушы кечкенә авылдан ничек зур шәһәр барлыкка килде икән соң? Кешеләр Кама автомобиль заводларын төзергә килгәннәр. Завод төзегәндә кешеләр палаткаларда, вагоннарда яшәгәннәр. Тиз арада Чаллы авылыннан зур Чаллы шәһәре барлыкка килә. Шәһәребез үсте, зурайды. Безнең шәһәрне сезнең әбиләрегез, бабаларыгыз төзеде. Хәзер сезнең әтиләрегез, әниләрегез зур биналар, матур йортлар төзиләр. Балалар, шәһәребезнең киләчәге сезнең кулларда. Безнең шәһәребез данлыклы! Шәһәребез һәрвакыт матур, күкләребез аяз булсын! Төзүчеләр.

Тәрбияче. Рәхмәт төзүчеләргә. (Балаларны активлаштыру). Балалар, менә без шәһәребезнең тарихы белән таныштык. Ни өчен безнең шәһәр “Яр Чаллы” дип атала? (Активлаштыру). (Индивидуаль һәм күмәк җаваплар). Балалар, безнең шәһәрне кемнәр төзегән? (Балаларның җаваплары). Дөрес, балалар, безнең шәһәрне төзүчеләр - сезнең әбиләрегез, бабаларыгыз төзегән. Ә хәзер зур биналарны, матур йортларны кемнәр төзи? (Балаларны активлаштыру). (Балаларның җаваплары). Балалар, безнең шәһәребез нинди? (Балаларның җаваплары). Әйе, безнең шәһәр матур, зур, данлыклы. Бергәләп кабатлыйк: данлыклы. (Индивидуаль һәм күмәк кабатлаулар). Балалар, шәһәребез матур булсын өчен безгә нәрсә эшләргә кирәк икән? (Балаларны активлаштыру). (Балаларның җаваплары). Әйе, шәһәребез матур булсын өчен агачлар, чәчәкләр утыртырга, урамнарны чиста тотарга, чүп ташламаска, әйберләрне ватмаска кирәк. Булдырдыгыз! Балалар, әйдәгез без сезнең белән менә бу төзү материалларыннан үзебезнең урамны төзик.

Тәрбияче балаларга төзү материаллары бирә. Балалар барысы бергә шәһәр күренеше төзиләр.

Тәрбияче. Урамыгыз бигрәк матур. Мин бу урамда яшәр идем! Балалар, ә сез бу урамга нинди исеме бирәсез? (Балаларны активлаштыру). (Балаларның җаваплары). Булдырдыгыз! Бик кызыклы исемнәр. Безнең урамның исеме “Яшь төзүчеләр” булыр. (Индивидуаль һәм күмәк кабатлаулар). Менә безнең шәһәребездә тагын бер яңа урам барлыкка килде. Булдырдыгыз!