Тема: Мин үзем өчен иң кадерле кеше

Бурычлар:

1) балаларда үзләренең уникаль (бердәнбер) һәм кабатланмас шәхес булулары турында күзаллаулар формалаштыру;

2) балаларның үзаңнарын үстерү;

3) тышкы кыяфәтләренә игътибарлылык тәрбияләү.

Җиһазлар: Белмәмеш(курчак), балалар санынча көзгеләр һәм балалар гәүдәсенең контурлы сүрәте (трафаретлар), төсле карандашлар.

Эшчәнлек барышы.

Балалар янына чәчләре тузган, җыйнаксыз Белмәмеш килеп керә.

Белмәмеш. Исәнмесез, балалар. Минем сезгә кунакка киләсем килде! Мин бик ашыктым!

Тәрбияче. Белмәмеш, нигә син шулай киенеп килдең?

Белмәмеш. Мин бик тырыштым, матур итеп киендем. Киемнәремне үтүкләдем, галстук та тактым.

Тәрбияче. Белмәмеш, син чыгып киткәндә үзеңне көзгедән карадыңмы? (Карадым, карадым). Белмәмеш, әгәр дә син үзеңне көзгедән караган булсаң, тузган чәчләр белән, болай җыйнаксыз киенеп килмәс идең. Балалар, көзге нәрсә өчен кирәк? (Балаларның җаваплары). Белмәмеш, көзгегә карап үзеңне тәртипкә китер әле! (Белмәмеш көзгегә карый, киемнәрен төзәтә). Балалар, сезнең дә үзегезне көзгедән карыйсыгыз киләме? (Балалар үзләрен көзгедән карыйлар). Алсу, син көзгедән нәрсә күрәсең? (Үземне күрәм). Дөрес, Алсу, син бу җир йөзендә үзеңә иң кадерле кеше. Марат, ә син көзгедән нәрсә күрәсең? (Үземне күрәм). Марат, син дә бу җир йөзендә үзеңә иң кадерле кеше.(Тәрбияче чиратлап һәр балага мөрәҗәгать итә). Бик яхшы! Балалар, мин дә үзем өчен бик кадерле. Сез дә минем өчен бик кадерле. Мин сезне бик яратам. Балалар, һәрберегез үзегезне тагын бер кат көзгедән карагыз. Авызыгызга, борыныгызга, күзләрегезгә игътибар итегез. Гүзәл, син нинди? Син үзеңнең авызыңны, борыныңны, күзләреңне нинди итеп күрәсең? (Тәрбияче башка балаларга да шушы ук сорауны бирә). Алсу, син башкаларга охшагансыңмы? Синең йәзең башкаларның йөзеннән нәрсә белән аерыла? (Чәчнең, күзләрнең төсе, борынның, иреннәрнең формасы). Дөрес, балалар, һәрберегезнең чәчләренең, күзләренең төсе, борын һәм иреннәр формасы башкаларныкыннан аерылып тора. Сезнең кайсыгыз турында ул почык(кечкенә) борынлы дип әйтеп була? (Балаларның җаваплары). Кемнең чәче сары төстә? (Балаларның җаваплары). Кемнең чәчләре кара төстә? Кемнең күзләре зәңгәр? (Балаларның җавплары). Ә кем коңгырт-кара күзле? (Балалар түгәрәккә, ә Белмәмеш түгәрәк уртасына баса). Балалар, Белмәмеш белән уйныйк әле.

Белмәмеш. Кемнең күзләре коңгырт-кара күзле шулар түгәрәк эченә керәләр. Кемнең чәче үрелгән, шул балалар түгәрәк эченә керәләр. Хәзер сары чәчле балалар түгәрәк эченә басалар. Чәче кыска булган балалар түгәрәк эченә керәләр.

Тәрбияче. Балалар,мин сезне бик яратам, сез минем өчен бик якын. Малайлар кыюлар, көчлеләр, ә кызлар нәфисләр, ягымлылар. Карагыз әле, безнең Алсу ничек матур итеп елмая. Маратның нинди ярдәмчел икәнлеген искә төшерегез. Әмир чын дус була белә...(һ.б). Балалар, мин сезгә әзер трафаретлар бирәм. Трафаретларга рәсем ясарсыз. Рәсем”Үзеңне бизә” дип атала. Сез үзегезне нинди итеп күрергә телисез, шулай итеп рәсемгә төшерегез. (Балалар трафаретларга рәсем ясыйлар). (Бизәлгән трафаретларны балалар бергәләп карыйлар. Рәсемне кем ясаганын әйтергә тырышалар).Балалар, рәсемнәрегезне өйдә стенага карават өстенә элеп куя аласыз. Иртән йокыдан уянгач, шушы рәсемгә карап, үзегезне сәламләгез, үзегезгә сәламәтлек, шатлык, яхшылык теләгез. Булдырдыгыз! Үзегезне һәрвакыт яратыгыз! Үзегезне беркайчан да онытмагыз!