41.Салық қызметін жүзеге асыратын органдардың өкілеттік щеңберін көрсетіңіз.

Салықтық құқықтық қатынастардағы салық қызметі органдарының орны олардың мемлекет өкілі ретінде және оның мүддесін көздей отырып, негізінен материалдық салықтық қатынастар ауқымында жүргізетін салық әкімшілігіне байланысты айқындалады.

Қазақстан Республикасы Салық кодексінде осы мән-жай «Мемлекет салық қызметі органы арқылы салық төлеушіден - оның салық міндеттемелерін толық көлемінде орнындауын талап етуге, ал олар орындалмаған немесе тиісінше орындалмаған жағдайда оларды қамтамасыз ету жөніндегі тәсілдерді және осы Кодексте көзделген тәртіппен орындату шараларын қолдануға құқылы» деген сипатта көрініс тапқан.

Қазақстан Республикасы салық қызметі органдарының жүйесі:

1. ҚР Қаржы министрлігінің Салық комитеті – уәкілетті мемлекеттік органы;

2. ҚР Қаржы министрлігі Салық комитетінің салық әкімшілігін жүргізу Басқармасы;

3. аймақаралық салық комитеттері;

4. облыстардың салық комитеттері;

5. Астана қаласы бойынша салық комитеті;

6. Алматы қаласы бойынша салық комитеті;

7. қалалар және қаладағы аудандар бойынша салық комитеттері;

8. арнайы экономикалық аймақтағы салық комитеттері.

Аталған салық органдары Қазақстан Республикасының Салық комитетіне төменнен жоғары қарай тікелей бағынады. Қазақстан Республикасы Қаржы министрлігінің Салық комитеті иерархиялық салық қызметі органдары жүйесіне басшылық етеді.

Қазақстан Республикасының салық салу жүйесін басқару (ұйымдастыру, реттеу) ауқымындағы салықтық қызметті жүзеге асыратын мемлекеттік лауазымды тұлға мен уәкілетті органдарға:

1. ҚР Президенті;

2. ҚР Парламенті;

3. ҚР Үкіметі;

4. Жергілікті Мәслихаттар мен Әкімдіктер;

5. ҚР кедендік бақылау агенттігі;

6. ҚР қаржы полициясы агенттігі;

7. ҚР Қаржы министрлігі;

8. Қаржы Министрлігінің Салық комитеті;

9. Қазақстан Республикасының экономика және бюджеттік жоспарлау министрлігі;

10. Астана, Алматы қалалары және облыстар мен аудандардағы және қалалардағы аудандар бойынша салық органдары және т.б. салық органдары болып табылады.

42.Жер салығын төлеушілер және салық салу объектілерін көрсетіңіз.

Барлық жерлер салық салу мақсатында олардың арналған нысанасы мен тиесілілігіне қарай мынадай санаттарға бөлінеді:

1) ауыл шаруашылық мақсатындағы жерлер;

2) елді мекендер жерлері;

3) өнеркәсіп, көлік, байланыс, қорғаныс және өзге де ауыл шаруашылығы емес мақсаттағы жерлер (өнеркәсіп жерлері);

4) ерекше қорғалатын табиғи аумақтар жерлері, сауықтыру, рекреациялық және тарихи-мәдени мақсаттағы жерлер (ерекше қорғалатын табиғи аумақ жерлері);

5) орман қорының жерлері;

6) су қорының жерлері;

7) запастағы жерлер.

Жердің белгілі бір немесе өзге санатқа жататындығы Қазақстан Республикасының жер туралы заң актілерімен белгіленеді. Елді мекендер жерлері салық салу мақсаты үшін мынадай екі топқа бөлінген:

1) тұрғын үй қоры, соның ішінде олардың жанындағы құрылыстар мен ғимараттар орналасқан жерлерді қоспағанда елді мекендер жерлері;

2) тұрғын үй қоры, соның ішінде олардың жанындағы құрылыстар мен ғимаратnар орналасқан жерлер.

Жер салығын төлеушілер:

1) жеке меншік құқығындағы салық салу объектілері бар жеке және заңды тұлғалар;

2) тұрақты жер пайдалану құқығындағы салық салу объектілері бар жеке және заңды тұлғалар;

3) бастапқы өтеусіз уақытша жер пайдалану құқығындағы салық салу объектілері бар жеке және заңды тұлғалар.