Есеп № 32

Науқас К., 14 жаста, ауруханаға түскен кезде жалпы әлсіздікке, оң жақ бүйірінің ауырсынуына, терісінің сарғаюына шағымданған.

Науқаста терісінің аздап сарғаюы балалық шағынан бастап байқалған. 3 ай бұрын оң жақ қабырға астында ауырсыну пайда болып, сарғаю күшейе түскен.

Объективтік тексеру кезінде анықталғаны: қан сарысуындағы билирубин мөлшері – 51 мкмоль/л, Эрлих диазореактивімен реакциясы тура емес. Зәрінде уробилин табылған. Нәжісі қарқынды боялған.

1. Сарғаю түрін анықтаңыз.

2. Сарғаюдың бұл түріндегі гипербилирубинемияның даму механизмі қандай?

Есеп № 33

Науқас А., 12 жаста, ауруханаға түскен кезде лоқсу, құсуға, терісінің қышынуына шағымданған. Бұл симптомдар 8 күн бұрын айқындалған.

Тексеру кезінде анықталғаны: терісі мен шырышты қабаттары сарғайған, бауыры мен көк бауыры ұлғайған. АҚ – сынап бағанасы бойынша 100/60 мм, пульсі – минутына 60 рет, ырғақты.

Қан сарысуындағы билирубиннің жалпы мөлшері – 76 мкмоль/л, оның ішінде тура емесі – 20,5 мкмоль/л. Зәрінде билирубин, уробилин табылған.

1. Сарғаю түрін анықтаңыз.

2. Науқастың зәрінде билирубиннің қандай түрі табылған?

Есеп № 34

Науқас Д., 39 жаста. Қатты тоңып қалып, ауруы жедел түрде басталап кеткен. Бірден жалпы әлсіздік, ентігу, тері мен шырышты қабықтардың шамалы сарғаю байқалған.

Лабораториялық тексеру кезінде анықталғаны: қан сарысуындағы билирубин – 70 мкмоль/л. Зәр мен нәжісінде көп мөлшерде уробилин, стеркобилин табылған. Зәрде билирубин анықталмаған.

1. Сарғаю түрін анықтаңыз.

2. Науқастың қан сарысуында қандай билирубин табылған?

Есеп № 35

47 жасар Т. деген науқаста ұзақ уақыт бойы мазалап жүрген диспепсиялық синдромға тез дамыған қарқынды сарғаю қосарланған.

Клиникалық-лабораториялық тексеру кезінде анықталғаны: бауыры ұлғайған, өт қабы пальпацияланады.

Қанында 342 мкмоль/л билирубин анықталған, Эрлих диазореактивті реакциясы тура. Зәрде үлкен мөлшерде билирубин анықталған. Нәжісі түссіз.

1. Сарғаю түрін анықтаңыз.

2. Бұл сарғаю кезіндегі қанда билирубин мөлшерінің жоғарлау механизмі қандай?

Есеп № 36

Науқас В., 32 жаста, ауруханаға жалпы әлсіздікке, ентігуге, терісінің сарғаюына, нәжісі мен зәрі түстерінің өзгеруіне шағымданып түскен.

Лабораториялық тексеру нәтижелері: қан сарысуындағы билирубин мөлшері – 68 мкмоль/л. Диазореактивті реакциясы - тура емес. Зәрінде билирубинге реакциясы теріс, ал уробилинді денешіктерге - оң.

1. Сарғаю түрін анықтаңыз.

2. Қандай өт пигменттері уробилиндік денешіктерге жатады?

Есеп № 37

32 жастағы В. деген науқас ауруханаға кенеттен басталған оң қабырға астындағы ауырсынуға, лоқсу, құсу сезімдеріне, терісінің сарғаюына шағымданып түскен.

Анамнезінде соңғы 5 жыл бойы оң қабырға астында ұстамалы түрде қайталанатың ауырсынулар болғанын айтады.

Объективті тексеру кезінде анықталғаны: терісінің сарғыштануы, пальпация жасағанда оң қабырға астының ауырсынуы. Дене температурасы -38,7º С.

Лабораториялық тексеру нәтижелері: қандағы тура билирубин – 68 мкмоль/л. Зәрдің түсі жасыл-сарғыш, билирубинге реакциясы оң, уробилинді денешіктер жоқ. Нәжісі саз тәріздес, түссіз.

1. Сарғаю түрін анықтаңыз.

2. Зәрде уробилиндік денешіктердің болмауы нені дәлелдейді?

Қан түзуші жүйе