2. Маңғыстау облысы тұрғындарын жұмыспен қамту саласындағы әлеуметтік саясат.

Маңғыстау облысы 1973 жылдың 20-шы наурызында Гурьев облысының оңтүстік бөлігінде құрылды. 1988 жылы облыс қысқартылып, 1990 жылы Маңғыстау деген атаумен қайта құрылды. Облыс Қазақстан Республикасының оңтүстік-батыс бөлігінде орналасқан, солтүстік-шығысында Атырау және Ақтөбе облыстарымен, ал батысында – теңіз бойымен Ресей Федерациясымен, Әзірбайжан және Иранмен, ал оңтүстігінде — Түрікменстанмен және шығысында — Өзбекстанмен шекараласады. Облыс орталығы - Ақтау қаласы 1963 жылы құрылған, Каспий теңізінің жағалауында орналасқан және Қазақстанның «теңіз қақпасы» болып табылады.

Маңғыстау облысының аумағы 165,6 мың кв. км (Қазақстанның жалпы аумағының 6,1%-ы) құрайды. Облыста 2 қала (Ақтау қаласы, Жаңаөзен қаласы), 5 аудан орталығы (Форт-Шевченко шағын қаласын қосқанда), 3 поселкелік, 39 ауылдық округтер мен 54 ауыл бар.

Маңғыстау облысының негізгі көрсеткіштері

Кесте 1

№	Атауы	2005	2006	2007	2008	2009
1	Облыс аумағы (мың кв. км)	165,6	165,6	165,6	165,6	165,6
2	Барлық тұрғылықты жер	56	58	60	60	60
3	Қалалар саны, соның ішінде:	3	3	3	3	3
4	облысқа бағынатын	2	2	2	2	2
5	ауданға бағынатын	1	1	1	1	1
6	Аудандар саны	4	4	5	5	5
7	Поселкелік және ауылдық округтер саны	37	38	41	42	42
8	Поселкалар мен ауылдар саны	53	55	57	57	57
9	Облыс тұрғындарының саны - барлығы (мың адам)	374,4	390,5	407,4	425,7	443,1
10	қала тұрғындары (%)	75,9	70,2	57,6	57,5	56,7
11	ауыл тұрғындары (%)	24,1	29,8	42,4	42,5	43,3

Облыс халқының саны 2009 жылдың 1 қаңтарына 443,1 мың адамды құрады.  Экономика салаларында жұмыспен қамтылғандар саны – 189,8 мың адам, жұмыссыздар 13,4 мың адам. Жалпы жұмыссыздық деңгейі 7,9 %-ан 6,9 %-ға төмендеді. [45]

Маңғыстау облысы Қазақстанның ең қарқынды дамып келе жатқан, инвестициялық және әлеуметтік тұрғыдан тартымды аймақтарының бірі болып табылады, жоғары миграциялық жылжымалықпен сипатталады. Облыс экономикасының негізін мұнай-газ өнеркәсібі құрайды және оның көлемі аймақта өндірілетін өнеркәсіптік өнімнің 90%-ын құрайды. Мұнай мен газдың мол қоры Маңғыстауды ірі отандық және шетелдік компаниялардың қаржылық мүдделерінің шоғырлану орталығына айналдырды.