«Алтын сапа» белгісі

1-тапсырма. Сөздікпен жұмыс. Сыйлық, арттыру, жарлық, жүлде, байқау, көрме, ескеру, үздік, нәтиже, енгізу, сұранысты қанағаттандыру, шағын кәсіпкерлік, орта кәсіпкерлік, ірі кәсіпкерлік, нысан, санат, аталым, өндірістік тауарлар, халықтық тауарлар, қару-жарақ пен әскери техника өндірісі, бәсеке.

2-тапсырма. Сөз тіркестерін жасап, сөйлемдер құраңыз.

1) президенттің а) сыйлық

2) мемлекеттік ә) қатысу

3) байқау б) санатты

4) көрмеге в) жарлығы

5) жүлдегер г) өткізу

6) жоғары ғ) атану

3-тапсырма. Мәтінді оқып, жоспар құрыңыз.

Қ азақстан өнім сапасын арттыруға ерекше ықылысты ел. Елімізде өндірілетін өнімдердің, тауарлардың, көрсетілетін қызметтердің сапасын арттыру, Қазақстан нарығын жоғары сапалы және бәсекеге қабілетті ету мақсатында Қазақстан Республикасының Президенті Н.Ә.Назарбаевтың 2006 жылғы 9 қазандағы №194 Жарлығына сәйкес «Алтын сапа» жүлдесі тағайындалды. Осыған орай, жыл сайын Қазақстан Республикасы Президентінің «Алтын сапа» байқауын және «Қазақстанның үздік тауары» республикалық байқау-көрмесін өткізу белгіленді. 2009 жылдан бастап байқау қазіргі заманғы менеджменттің даму тенденцияларын ескеретін және сапа бойынша Еуропа сыйлығы үлгісімен үйлестірілген жаңа үлгі бойынша өткізіледі.

Байқауға қатысудың негізгі критерийлері өнім өндіруде, қызмет көрсетуде жоғары нәтижелерге қол жеткізу, бәсекеге қабілеттілікті арттыру, сапаны басқарудың тиімді әдістерін пайдалану, халықаралық стандарттарды енгізу, тұтынушылардың сұранысын қанағаттандыру болып табылады.

«Алтын сапа» сыйлығы «Шағын және орта кәсіпкерлік нысандары», «Ірі кәсіпкерлік нысандар» деген екі санат бойынша үш аталыммен өткізіледі:

1. «Үздік өндірістік тауарлар»;

2. «Үздік халықтық тауарлар»;

3. «Үздік қызмет саласындағы тауарлар».

Сыйлыққа ие болу үшін Қазақстан Республикасы аумағында тауар өндіретін, қызмет көрсететін (қару-жарақ пен әскери техника өндірісін есептемегенде) заңды тұлғалар өзара бәсекеге түсе алады.

4-тапсырма. Мәтін бойынша берілген ақпараттың дұрыс, бұрыстығын анықтаңыз.

Сөйлемдер	Дұрыс	Бұрыс
1. Қазақстан өнім сапасын арттыруға ерекше мән береді.
2. «Алтын сапа» жүлдесін тағайындаудың басты себебі – отандық өнімдердің сапасын арттыру.
3. «Алтын сапа» жүлдесі ҚР Заңына сәйкес тағайындалды.
4. «Алтын сапа» байқауы екі жылда бір рет өткізіледі.
5. 2009 жылдан бастап байқау жаңа үлгі бойынша өткізіледі.
6. «Алтын сапа» сыйлығы үш санат бойынша беріледі.
7. «Алтын сапа» байқауы екі аталым бойынша өткізіледі.
8. Байқаудың «Үздік шетелдік тауарлар» деген аталымы бар.
9. Байқауға ҚР аумағында тауар өндіретін, қызмет көрсететін заңды тұлғалар қатыса алады.
10. Байқауға қару-жарақ пен әскери техника өндіретін заңды тұлғалар да қатыса алады.

5-тапсырма. Берілген үлгіге қарап, хабарландыру жазыңыз.