2.4. Қозғалтқыштардың жалпы құрылысы

Автомобильдерде қолданылатын қозғалтқыштар мынандай бөліктер мен жүйелерден құралады: иінді – бұлғақты және газ тарату механизмдері, қоректендіретін, майлайтын, салқындатын және тұтандыратын қондырғы жүйелерден тұрады.

Иінді – бұлғақ механизм. Иінді – бұлғақ механизмнің бөлшектерін қозғалатын және қозғалмайтын бөлшектер деп екі топқа бөлуге болады. Қозғалмайтын бөлшектерге цилиндр қаңқасы мен цилиндрлер бастиегі, ал қозғалатын бөлшектерге поршень, шатун және иінді білік топтарының бөлшектері жатады. Сонымен қозғалтқыштардың иінді – бұлғақ механизмдері мынандай бөлшектер тобынан құралады: цилиндрлер тобы, поршень тобы, шатун тобы және иінді білік тобы.

Осы көрсетілген бөлшектер тобының әрқайсысы белгілі бір қызметті атқарады. Цилиндрлер тобы – поршеньнің әрі – бері қозғалысы кезінде бағыттаушы қызметімен қоса, оның ішінде процестер жүру үшін қажетті көлем жасап тұрады. Поршень тобының бөлшектері цилиндр мен аралықтағы қозғалуға қажетті болатын саңылауды неғұрлым берік бітеп, цилиндр ішінде жүретін процестерге байланысты газ қысымын қабылдау қызметтерін атқарады. Бұлғақ тобының бөлшектері поршень мен иінді білікті жалғастырып, поршеньде пайда болған газ қысымының күшін иінді білікке жеткізеді, ал керек болғанда иінді біліктегі күшті поршеньге жеткізеді. Сөйтіп, поршеньнің түзу сызықты қозғалысын, иінді біліктің айналмалы қозғалысына ауыстыру қызметін атқарады. Иінді білік тобы бұлғақтан келген күштің әсерінен өзі айналмалы қозғалысқа келеді де, сырттағы трансмиссия арқылы жетекші доңғалақтарды айналдырады.

Цилиндрлер арнаулы құйылып жасаған блоктағы ұяларға бекітіледі. Егер цилиндр «дымқыл» болса, онда оның төменгі және жоғарғы беттері ғана ұяға жанасады. Ол жерді арнаулы аралық төсемдермен, сұйық ақпайтындай етіп бітейді. Ал құрғақ цилиндрлерді өн бойында бітеу жасалған ұяларға престеп орнатады.

Иінді – бұлғақ механизмнің қозғалатын бөлшектер тобы 2.5 – суретте көрсетілген.

Иінді – бұлғақ механизмнің қозғалатын бөлшектер тобына поршень, бұлғақ тобы және иінді – білік тобы. Олар бір – бірімен арнаулы бөлшектер арқылы жалғасады.

Поршень тобына поршенннің өзі (15), сақиналары және саусағы (6) жатады. Поршень саусағы (6) (2.5 – сурет) іші қуыс түтік тәрізді болаттан шыңдап жасалады.Ол екі ұшымен поршеньдегі қалың құйылмаға (3) тығыз кіріп тұрады да, ортасында шатуннның жоғарғы басы (7) (2.5 – сурет) орналасады. Сонда сол саусақ арқылы бұлғақ бұрылып, бұлғақтаған қозғалыс жасай алады.

Бұлғақ тобының бөлшектері негізгі шатуннан, жоғарғы және төменгі басындағы ішпектерінен (подшипник) құралады.

Б ұлғақтың өзі ішінде ішпегі бар жоғарғы бастиегінен (7), сол сияқты төменгі бастиегінен (10,11) және өзегінен (8) құралады. Жоғарғы бастиегі, ішіндегі ішпегімен (көбінесе қоладан жасалады) поршень саусағына кіріп тұрады да оны поршеньмен жалғастырады. Ол үнемі өзара қозғалып тұратындықтан, үйкелетін саусақ пен ішпек беттерін майлайтын тесік жасалады. Бұлғақ өзегі екі қырлы етіп жасалады.

Бұлғақтың төменгі басы екіге жарылып (10, 11) жасалғандықтан, оны иінді біліктің мойнына кигізуге мүмкіндік туады. Сол сияқты оның ішпегі (4) де екі жартыдан құралады. Бұлғақтың төменгі бөлігін оның қақпағы деп атайды және ол болттар (9) арқылы иінді білік мойнына киілгеннен кейін, бұлғақ басының екінші жартысына бекітіледі.

Қозғалатын бөлшектер тобындағы ең күрделісіне иінді біліктің бөлшектер тобы жатады. Бұлар иінді біліктен, оның ішпектерінен, сермерден(маховиктен) және басқа жүйелердегі механизмдерді іске қосатын тістегеріш(шестерня) (31) мен шкивтен (33) құралады.

Иінді біліктің негізгі қызметі бұлғақтан келген күшті иін түрінде жасалған бұлғақ мойны (3, 13) арқылы қабылдап, тірек мойындары (29, 12, 24, 19) арқылы айналмалы қозғалыс жасайды. Тірек мойындары мен бұлғақ мойындарымен жақтау (25) арқылы жалғасып тұрады. Кейбір жақтауларға тірек мойындарын ортадан тебетін күштерден жеңілдету үшін қарсы жүктер (28, 17) бекітіледі.

Иінді біліктің алдыңғы жағынан (32) тістегеріш(шестерня) (31) бекітіледі. Ол тістегеріш газ тарату механизмін іске қосады. Онымен қоса белдікті беріліс үшін шкив (33) бекітіледі де онымен салқындату жүйесінің, электр генераторларын және тағы басқа осындай қосымша құралдарды қимылға келтіреді. Иінді біліктің артқы жағына (20) арнаулы фланец арқылы сермер(маховик) (18) бекітіледі.

Иінді біліктің осы көрсетілген бөлшектері біртұтас біріктіріліп болаттан қалыптастыру (штамптау) арқылы жасалынады. Сондықтан олар бөлшектенбейді. Иінді біліктің пішіні қозғалтқыштың цилиндр саны мен жұмыс тәртібіне қарай

заводта бір – ақ рет жинақталып құралады. Тірек мойындарындағы ішпектер, жоғарыда айтылған, бұлғақ ішпектері тәрізді жасалады. Олар арнаулы жарты төсемелер (22, 27, 30) арқылы цилиндр блогының картеріне бекітіледі.

Иінді біліктің өн бойында жағармай жүретін қуыстар (23) жасалып, арнаулы тығындармен жабылып қойылған. Сол қуыстар арқылы тірек және бұлғақ мойындары қысыммен келетін маймен майланып тұрады. Әрі сол майлар ортадан тепкіш күштің әсерінен тазаланады, яғни майдың құрамындағы лас заттар сол қуыстардың керегелеріне жабысып қалады. Қозғалтқышты күрделі жөндеу кезінде арнаулы тығындарды ашып, сол қуыстарды тазалап отырады.