8. Воззвание патриарха Иосафа и освященного собора к царю Алексею Михайловичу

Пресветлейшему, благочестивейшему, тишайшему, самодержавнейшему великому государю, царю и великому князю Алексию Михаиловичу, всея великия и малыя и белыя России самодержцу, истинному благочестия ревнителю, второму Константину, новому Феодосию, всех благочестия любителей превосходителю. Иоасаф Божиею милостью патриарх Московский и всея России со всем освященным собором мира, здравия и спасения.

Бог всемогущий, им же царие царствуют и господие господствует, трегуб сан, по всеродном потопе тремя сынами праведнаго Ноя образованный благоволил есть имети; рабски, Хамом прописанный, священнически – Симом назнаменованный, и господьский или обладательский, Иафетом изображенный. От них же перваго звание есть работати господем своим, втораго – служительство есть: о обоих ко Богу молбы возсылати, третьяго паки дело обоих защищати, обраняти и отмщати, по оной всенародно притчи: Хам трудися, Сим молися, Иафет обоих мстися. Мы убо, богомольцы пресветлаго престола твоего, Симом образованнии, архиереиБога вышняго, о нем же нам попечение имети господствует, труды ко трудом прилагающе, Богу поспешествующу, подщахомся чрез сие настоящего собора время, твоим царским повелением и тщанием совокупленнаго, сотворити: еже есть взыскати злоказненныя расколоначальники, велий мятеж в церкви Божии творящия, премногия правоверных души в дебрь геенны низводящия, и поимати яко лисовы хитрыя, ошипами прелести связанныя, огнем раскола и суемудрия жатву домовита небеснаго попаляющия, яже обретше и Христовою благодатию емше, пастырски прежде поучахом проповедию слова Божия и по святому апостолу Павлу: настояхом благовременне и безвременне, обличахом, запрещахом, молихом со всяким долготерпением и учением. И Божием милосердием многия от душепагубныя пропасти к единству церкве возвратяхом, разве малых числом неких мятежетворцев, их же гордости начальник диавол горделивая сердца твердее камене ожесточив, неточию сотвори непокорятися церкви, и аспидски ушеса свои затыкати, но зубы их содела оружия и стрелы, и язык их меч остр на сосечение и стреляние удов тела церкве. Тем же вменихом их яко мытаря и язычники и властию нам от Бога данною анафематствовахом их, предавше диаволу на измождение плоти, да дух спасется. Обаче ниже сим образом успехом что на них, яко весма жестотою непокорства оболкшеся, диавольстии суть ратницы, на церковь хулная отрыгающе словеса, на святая и на священная, якоже и помянути трепетно и ужасно. Тем же убо яко волки хищныя из церковнаго стада взгнавше я, яко вредныя уды отсекше, яко смертоносныя скорпии из недр церковных извергше, всего обнаживше священства, предлагаем твоему царскому суду. И молим, подражающе отцем святым, яко праведнейшаго Иафета, да прекрепкою десницею твоею защитиши церковь Божию от них, да мстиши им безбожное ратование, и оброниши овцы стада Христова от зубов их волчиих, да нектому бегают и рыкают, во еже что восхити и поглоти. Поревнуй, правоверный царю, царем благочестивым, ихже деяний списание в последующем свитце твоей ревности во образ предлагаем. Сим ревнителем церкве, внегда аще уподобитися восхощет твое благочестие, тогда узрит мирное устроение церкве и всего царстия православаго, тогда службу принесет твоя царская кротость Богу достойную временных и вечных в торжествующей церкви воздаяний, ихже мы богомолцы твоего пресветлаго царскаго величества вседушно желаем.

Каптерев Н.Ф. Патриарх Никон и царь Алексей Михайлович. – М.,1996. – Т.2. – С.XIX-XX