9. Из «Карамзинского хронографа»1

<…> Того же 114 году при державе государя царя и великаго князя Василья Ивановича всеа Русии в Украйных, в Польских и в Северских городех учинилася прелесть и смута, бутто вор Гришка Розстрига, которой был на Москве царем, ушел в Литву и по городам от царя Василья отложились и целовали крест царю Дмитрею Ивановичю всеа Русии, а государь царевичь в вечном блаженстве опочивал на Углече, и в тех в Украйных в Польских и в Северских городех тамошние люди по вражию наважению бояр и воевод и всяких людей побивали розными смертми, бросали с башен, а иных за наги вешали и к городовым стенам распинали и многими разноличными смертьми казнили и прожиточных людей грабили, а ково побивали и грабили и тех называли изменники, a oнe будто стоят за царя Дмитрея, и по городам побили до смерти боярина князя Петра Ивановича Буйносова, боярина князя Василья Кардануковича Черкасково, воеводу Ефима Вахромеевича Бутурлина, князя Василья Тростенсково, Петра Вердеревскова, Семена Мальцова, в Путимле убили Микиту Васильева сына Измайлова. Да в Путимль привезены в 115 году в осени к вору Петрушке Никита Васильев сын Измайлов от Николы Зарайскова, да с Резани Прокофей Ляпунов прислал в Путимль князя Гаврила князь Семенова сына Каркадинова, и те в Путимле убиты ж, и во многех городех воевод и всяких знатных людей побивали, а сами воровали будто стояли за царя Дмитрея и за племянника его Петрушку, а тово вора ково называли царевичем Димитрием, нигде в те поры и не объявился, а Петрушка родом Муромца посадцково человека сапожника сын, и был в Свияжских стрельцах в приказе у головы стрелецкова у Григория Елагина, и был у нево в денщиках, а назвали его на Терке воры казаки царевичем царя Федора Ивановича сыном. И того ж году царь Василей Иванович всеа Русии не терпя их воровства и измены, на Полские и на Украйные городы посылал бояр своих и воевод по полком, в большем полку князь Юрьи Никитичь Трубецкой да боярин Михайла Александровичь Нагой, в передовом полку боярин князь Борис Михайловичь Лыков, да князь Яков Потровичь Борятинской, в сторожевом полку околничей князь Григорей Петровичь Ромодановской.

115 году в осень Украйных и Полских, и Северских городов дворяне и дети боярские и всякие служилые люди, и посадцкие люди, и крестьяне собралися со всяким боем и пошли под Московское государство, а будто стоят за царя Димитрея и хотя доступить и Московское государство разорить, а началники у тех воров были воеводы, у резаньцов воеводы Григорей Федоров сын Сунбулов, да Прокофей Петров сын Ляпунов, а с тулены и с коширяны и с веневичи Истома Пашков; а на Веневе был сотник, а с колужены и со олексенцы и с-ыными городами Ивашко Болотников, князя Ондрея Телятевского холоп, и иные воры были началники. <...>

Восстание И.Болотникова. Документы и материалы. - М.: Соцэкгиз,1959. – С.110-111

10. Из «Казанского сказания»1

<…> Грех же ради наших всего православнаго христьяньства воста ин враг, именуя себя царевичем Петрушка. Прииде из Астрахани з Доньскими и с Волъскими казаками в Путимль и нача пагубныя беды сотворяти, именуя себя внуком великого государя царя и великого князя Федора Ивановича. Людие же в той в Северной стране и в украиных городех и на Резани осуетишася помыслы и забыша судеб божиих, еще не исполнишася сердца их пролития кровей неповинных, чающе его тако быти. И поведоша из градов державных вельмож, бояр и воевод и стратигов и тысещников и воем начальных к нему в Путимль, искаху богатых и доброродных. Он же окаянный Петрушка не знаше бога и повеле избивати их пред собою на подромех, числом на день по семидесять человек. И паки началных и доброродных воинов имения их в разграбление повеле расхищать и жены и тщеря их блудом повеле оскверняти. Зла убо сия беда и скорбь взыде на християньский род, гнев божии, и пролияшаяся многия крови праведных, овых мечем скончевая, овых возводя и меташа с высоты з градных стен на землю, и разбивашеся телеса их, иных же розстрилявающе и за ноги повешающе и распинаше. Тако и многими разноличными муками погибляюще, не возмогу убо, не токмо изрещи, но ни воспомянути таковыя злокрутныя скорби, нашедшия на ны, грех ради наших. Он убо, прежереченый вор, Гришка Богданов сын Отрепьев, прият первее иноческий аггельский образ и бысть в Чюдове монастыре в дияконех, потом же взя его патриарх Иев к себе, потребы ради книжнего писания. Он же окаянный видев свет и избежа во тму, в Польшу, и многа зла сотвори вере христове. Сей же проклятый наследник его, Петрушка безделен, и ничто же в нем разума, но яко свиния в тинении валяяся. Но тии же приидоша с ним из Астарахани зверообразни гултаи, ноосщряшася на зловредные своя мысли, и бысть скорбь, плачь, кровопролитие, горши первыя беды и нахождения.

Первая убо бысть бранем строением сшедшимся, овии преодолеша и паки разыдошася по местом. Сия же горкая скорбь, не бысть такова николи же от начала века, ни во градех, ни в весех, нигде никто не уклонишася, ни в дебрях, ни в горах.

Грех ради наших вся явна бысть, вся обнаженна, исторгающе, яко класы от нив, убивающе и безчисленно изливая праведную кровь, к телесем убо многих виде, яко многа дни лежа ничто же вреди их от теплоты и ни зверь, ни птица, ни лаина не прикоснуся. Той же окаянный Петрушка посла пред собою из Путимля под Москву Ивашка Исаева сына Болотникова, и возмутишася во странах тех и во градех людие, глаголя: «идем вси и приимем Москву и потребим живущих в ней и обладаем ею, и разделим домы вельможь и сильных, и благородныя жены их и тщери приимем о жены себе». И изыдоша множества народу с ним и не осташася во странах тех, ни во градех, ни в селех, никто же, но токмо женский пол осташа. И приидоша под Москву многочисленно бе убо, яко 187 000, и оступиша по странам <…>

Тихомиров М.Н. Новый источник по истории восстания Болотникова // Исторический архив. – М.;Л.: Изд-во АН СССР,1951. – С.115-116