Б. Гражданская война

7. Из «Пискаревского летописца»

О царьстве царя и великого князя Василия Ивановича Шуйского. После Ростриги Гришки Отрепьева почал на Москве мятеж быти во многих боярех, а захотели многие на царьство. А дворяне, и дети боярские, и всякие служивые лю­ди: хто х кому прихож и кто ково жаловал, те тово и хотят а иные иново хотят: хто х кому добр. И в том почали великое волнение быти во всех людех. А того кабы не ведая: никто же о себе честь приемлет, но званный от бога! Несть есть власти на земли, кая не от бога, и паче царьская власть! Царь на земли почтен от бога образом его и поставлен на отмщение грешником и на похвалу праведником. И придем впредь на сказание о сем. И приговорили все бояре, и дворяне, и дети боярские, и гости, и торговые люди: что выбрать дву бояринов и на Лобном месте их поставити и спросити все­го православнаго християнства и всего народу: ково выбе­рут народом, тому быти на государьстве. И выбрали дву бояринов: князя Федора Мстисловского да кня­зя Василья Шуйскаго, и привели их на Лобное место, и всем народом выбрали на Лобном месте боярина князя Василья Ивановича Шуйского, и наркли его на все православное християнство царем и великим князем на третей день после Остригина убиства. И с Лоб­ного места князь великий Василей пошел в Пречистую соборную церковь, и там молебна слушал, и осенил его крестом Крутицкой митрополит, и крест на него жи[во]творящего древа положил, которой на собя кладут крест цари в царьское поставление, и молитву над ним наречен­ную говорили, а царьским венцом венчался того же 7114 году¹ июня в 1 де[нь], и крест ему целовали бояре, и дворяне, и дети боярские, и всякие люди, и все городы Московского государьства. И немного спустя по­чал и мятеж быти в северских градех и в украинских, и стали говорити, что жив царь Дмитрей, утек, что был Рострига, не убили его. И с тех мест стали многие называтца воры царевичем Дмитреем за грехи наши всех православ­ных християн. <...>

Должно нам еще о сем сказати: о царе и великом кня­зе Василье Ивановиче Шуйском и о преступления к не­му в крестном целовании бояр, и дворян, и детей боярских, и всех православных християн, и его запись тут же, по которой он крест целовал всем православным хресьяном. Понеже есть ни царственые книги гла[г]олют что царю крест целовати подручником своим, ни в без­божных бо языцех обретаетца так. И по воле его быша тако.

Запись царя и великаго князя Василья Ивановича, по которой он крест целовал. «Божиею милостию мы, великий государь царь и великий князь Василей Иванович всеа Русии, щедротами и чело[в]еколюбием славимаго бога и за молением всего ос[в]ященнаго собора, и по челобитью и прошению всего православнаго християнства, учинилися есми на отчине праро­дителей наших, на Росийском государьстве царем и вели­ким князем, его же дарова бог прародителю нашему Рюрику, иже бе от римского кесаря. И потом многими леты и до прародителя нашего великаго князя Александра Ярославича Невскаго на сем Росиском царьстве быша прародители мои. И по сем на Суздаль­ской уезд разделишася не отнятием и не от неволи, но по родству, яко же обыкли большая братия на большая ме­ста седати. И ныне мы, великий государь, будучи на пре­столе Росийскаго царьствия, хотим того, чтобы православ­ное християнство было бодроопасным правительством в тишине и в покое, и во благоденствии. И поволил есми яз, царь и великий князь Василей Иванович всеа Русии, целовати крест на том, что мне, великому госу­дарю, всякого чело[в]ека, не осудя истинным судом з бояры своими, смерти не предати и вотчин, и дворов, и животов и у братьи их, и у жен, и у детей не отнимать и будет которые с ними в мысли не были; также у гостей, и у торговых людей, и у черных, хоти которой по суду и по сыску дойдет и до смертные вины, и после их у жен и у детей дворов, и лавок, и животов не отнимати, будет с ни­ми они в той вине не были и невинны. Да и доводов лож­ных мне, великому государю, не слушати, а сыскивати всякими сыски накрепко и ставити с очи на очи, чтоб в том православное християнство без вины не гибло. А хто на кого солжет и, сыскав, того казнить, смотря по вине его, что взвел не подельно, тем судом осудитца. На том на всем, что в сей записи писано, и яз, царь и великий князь Василей Иванович всеа Русии, целую крест всем православным християном, что мне их, жалуя, судити истинным праведным судом и безвинно ни на кого опалы своей не класти и недругом никому никого в не­правде не подати и от всякого насильства оберегати». <…>

Пискаревский летописец // Материалы по истории СССР. –

М.: Изд-во АН СССР, 1955. - Вып. II. – С. 123-124, 127