11. Запись продолжателя «Летописца начала царства» об отмене кормлений и об «Уложении о службе 1555-1556 гг.»

Приговор царской о кормлениах и о службе. Лета 7064-го приговорил царь и великий князь Иван Васильевич всеа Русии з братиею и з боляры о кормлениях и о службе всем людем, как им вперед служити. А посе время бояре и князи и дети боярские сидели по кормлением по горо­дом и по волостем, для росправы людем и всякого устрое­ниа землям и собе от служеб для покою и прекормления; на которых городех и волостех были в кои лета наместникы и волостели, и тем городом и волостем розсправу и устрой делали и от всякого их лиха обращали на благое, а сами были доволны оброкы своими и пошлинами указными, что им государь уложил.

И вниде в слух благочестивому царю, что многие грады и волости пусты учинили наместникы и волостели, изо многых лет презрев страх божий и государьскые уста­вы, и много злокозненых дел на них учиниша; не быша им пастыри и учители, но сътворишася им гонители и разо­рители. Такоже тех градов и волостей мужичья многие коварства содеяша и убийства их людем: и как едут с кормленей, и мужики многими искы отъискывают; и много в том кровопролития и осквернениа душам содеяша, их же не подобает в христианском законе не слышати; и многие наместникы и волостели и старого своего стяжениа избыша, животов и вотчин.

Царю же благочестивому обычай бяше таков: начало его премудрости страх господень, а все перед богом собя чиста соблюдает, церковное предстояние в страсте и трепете имети, ничто же глаголюще, ниже помышляюще в время святого пения, токмо съвесть своя пред богом исправляюща; и на всяк день некоторым обычаем не разлучится от преданнаго правила божественаго всего церковнаго, такоже и уединеная молитва, потом же суд и правда нелицемерна всем; потехи же царьскые, ловы и иные учрежения, еже подобает обычаем царьскым, все оставиша, но тъщащеся по Христе волю его сътворити во всем и порученые ему государства съблюсти и устроити во всем подобие вправду и оборонити от всех иноверных бусурман и латын. А храб­рость же и мужество его и от бога даное ему благородие како тщится за благочестие поборати по всяк день и час? Ничто же ино съдевает, токмо о том печется, как утвердити закон и веру пресветлую и благочестивую христиан­скую в всех подрученных ему государствах; тако же и против неверных на вся лета и в вся времена въоружается и поборает, ополчаетца, како бы свободити правосла­вие от рук нечестивых; не токмо не щадит своей царьской вые приимати всегда нужде и не радит о сем но паче тщится всегда о пролитие своей праведной и царской кро­ви, о избавлении единородных наших братии православных христиан; и иное услаждение и потехи никоторые в ум его царьской не внидут, токмо о избаве христианом, просто рещи, толко закон Христов и ратные дела. Любовь же его по бозе ко всем под рукою его, к велможам и к средним и ко младым ко всем, равна: по достоянию всех любит, всех жалует и удовляет урокы вправду, против их трудов, и мзды им въздает по их отечеству и службе; ни единаго же забвена видети от своего жалования хочет, такоже ни­кого ни от кого обидима видети хощет. И такова его бог яве царя и государя православным землям уродил подра­жателя прежним и благочестивым царем и храбрым госу­дарем; паче же иных благодать свою на нем всемогый бог показа, потребителя его бусурманом и иноверным сътвори; и какова его бог створи, и по тому тщится и подручных всех пред богом в законе христианском и непорочных поставити и обращая их от всех недобрых дел; яко же есть речено в святем еуангелии: пастырь добрый иже душю свою полагает за овца, и истинный пастырь, а не наемник, о всех промышляет душами их, такоже и пищею и одежею вправду устроит; и хощет от бога в страшное второе при­шествие праведный глас слышати: «Ты еси царь правде», и ему же бы без стыда отвещати: «Господи! Се аз и люди, яже ми еси дал».

О повелении царьском. И повеле государь во градех и в волостях разчинити старосты, и сотцкые, и пятьдесятцкые, и десятцкые и з страшным и грозным запрещением заповедь положити, чтоб им разсужати промежь разбои и татбы и всякие дела, отнюдь бы никоторая вражда не именовалася, также ни мзда неправедная, ни лжывое послушество; а кого промеж собою такова лиха найдут, таковых велел казнем предавати; а на грады и на волости положити оброкы по их промыслом и по землям, и те оброкы збирати к царьскым казнам своим диаком; бояр же и велмож и всех воинов устроил кормлением, праведными урокы, ему же до­стоит по отечеству и по дородсту, а городовых в четвертой год, а иных в третей год денежьным жалованием. <…>

О расмотрении государьском. По сем же государь и сея расмотри: которые велможы и всякие воины многыми зем­лями завладали, службою оскудеша, — не против госуда­рева жалования и своих вотчин служба их — государь же им уровнения творяше: в поместьях землемерие им учиниша, комуждо что достойно, так устроиша, преизлишки же разделиша неимущим; а с вотчин и с поместья уложеную службу учини же: со ста четвертей добрые угожей земли человек на коне и в доспесе в полном, а в далной поход о дву конь; и хто послужит по земли, и государь их жалует своим жалованием, кормлении, и на уложеные люди дает денежное жалование; а хто землю держит, а службы с нее не платит, на тех на самех имати денги за люди; а хто дает в службу люди лишние перед землею, через уло­женные люди, и тем от государя болшее жалование самим, а людем их перед уложеными и полътретиа давати денгами.

И все государь строяше, как бы строение воинъству и служба бы царская безо лжи была и без греха вправду; и подлинные тому розряды у царьскых чиноначалников, у приказных людей.

Памятники русского права. – М.: Гос. изд-во юридич. лит-ры,1956. – Вып.IV. – С.583-586