6. Из сочинения з.Отенского о «новом учении» Федосия Косого1

<…> Раби неции в граде Москве, украдше от стяжаниа господий своих, бежаша в пределы Белозерскиа. Убояша же ся мук от господий своих, внидоша в манастыря и постригошася. Потом совокупишася на Новоозере Федосей, нарицаемый Косой, и Игнатей, и Васиан, ученикы Артемиевы, и инии с ними. Тии мниси развратишася в ересь, нарицаемую безбож­ную, отвергошася христовы виры, и вселися в них дух лукавый, начата своей ереси учити и иныа. Бысть же от святаго собора, иже в Москве взыскание от безбожной сей ереси. Тогда началницы ереси тоа разбегошася от Новоозера: Игнатей на Двину, Косой и Васиан с прочими — в Литву. Бежаще же в Литву, проидоша Псков, и Торопец, и Лука Великиа, везде стзюще свою злую ересь. Присташа же в месте, нарицаемем озеро Усочорт, имена своа преименоваша, да не уведани будут, и многиа совратиша от православной веры во свою прелесть, не токмо не боящаяся бога и грехолюбныа, но и богобоязнивых смиреных людей.

Учаху же, прельщающе люди простыа нравом: преже хулити манастыри, оклеветающе их, яко села имяху, таже попы и епископы укаряху, глаголюще: «Живут попы и епископы не по Евангелию, ложние учитилие, имениа збирают, ядять и пиють много, и по Евангелию не учат, учат человеческая преданиа». Себе же еретицы они глаголют — истину паче всех познали, и живут по Евангелию, и разум имеют больши святых отец. Та же святых отец хулят и неистинными учители их нарицают, себе именуют истинными учители. Потом хулят святыа церкви, нарицающе их кумирницею, крест христов и иконы святыа кумиры нарицаху, святых мученик и всех святых мощи еллиньскими мертвецы именоваху, и почитающих святая и божественная вся, погибшими и заблужшими именуют, и последующих человеческым преданием. Ясти же и пити повелевают без воздержаниа, мяса и вся по вся дни и нощи ести, святости и освещения никоея же не нарицати, ни мнети ничто же свято ниже освещенно. Такоже и молитвы творити не повелевают, ни покланятися богу, ни поститися. Тако же и нечистым не нарицати ничто же, и скверна никакова не мнети ни в чесом же, и по блуде не отмыватися повелевают, мнети же вся чиста. И вси веры в всех землях однакы мнети. Книгы святых отец и правила церковная ложным писанием именуют; токмо едины книгы повелевают ветхиа прочитати, и евангелие и апостол и великого Василиа Постническую книгу, и Златаустов Маргарит токмо. Сиа же книги едины прочитати сего ради повелеваху, понеже из них строкы избирающе, и по развращенному своему разуму ложно толкующе сиа, прельщают неразумеющих писаниа в свою пагубную ересь, прочая же книгы святых отец, и мучениа святых и житиа, и учениа не повелевают прочитати. Учат же и не веровати в святых благодати божиа быти, и чюдеса от них ложны именующе, и пророчества не святым духом бывающа, и богородицу просту жену быти глаголют. <…>

Об умствованиях Косого (из «Многословного послания» Зиновия Отенского) // Памятники литературы Древней Руси. Середина XVI века. – М.: Худож.лит-ра, 1986. – С. 234, 236

7. Послушная грамота царя Ивана IV на деревни Хованского стана Волоцкого уезда (1564 г., июля 11)

От царя и великого князя Ивана Васильевича всеа Русии в Волотцкой уезд в Хованской стан Буегородцкого села в деревни, что остались за мерою Осифова мона­стыря у игумена Леванида з братьею, в деревню Поповкину, в деревню Руново, в деревню Овсеево всем крестьяном, которые в тех деревнях живут.

Пожаловал есми теми деревнями Осифова ж мона­стыря игумена Леванида з братьею, или хто по нем иным игумен в том манастыре будет, сверх их земель к их же волоцким землям, что им дано против их волотцких же земель, что у них взято к нашим к дворцовым селом. А в книгах отделу Волотцкого губного старосты Григорья Чеглокова лета 7072-го в тех деревнях написано пашни сто шездесят чети в одном поле, а в дву по тому ж; сена сто дватцать копен, лесу на шесть чети. И вы бы, все кресть­яне, которые в тех деревнях живут, Осифова монастыря игумена Левонида з братьею, или хто по нем иный игумен в том монастыре будет, слушали, пашню на них пахали и оброк им платили.

Писано на Москве лето 7072-го, июля в 11 день.

Оборот: царь и великий князь всеа Русии.

Памятники русского права. – М.: Гос. изд-во юридич. лит-ры ,1956. – Вып.IV. – С.65-66