3. Письмо о нелюбках иноков Кириллова и Иосифова монастырей2

Спросил мя еси, почему Кирилова монастыря старцы Иосифовых старцов не любит. И яз вкратце реку ти, с коих мест нелюбка меж их.

Егда бысть собор при великом князе Иване Васильевиче всея Русии и при Симоне митрополите, о вдовых попех и о дияконех в лето 7012, а на том соборе были архиепископы и епис­копы и архимандриты и честныа игумены и честныя старцы изо многих монастырей. Да тут же был старец Паисея Ярославов, еже бысть приемник великого князя Василия от святыя купели, и ученик его старець Нил, пореклу Майков. Сей Нил был в Святей горе, и князь велики держал их в чести в велице. И егда совершися собор о вдовых попех и о дияконех, и нача ста­рец Нил глаголати, чтобы у манастырей сел не было, а жили бы черньцы по пустыням, а кормили бы ся рукоделием, а с ним пустынникы белозерские. И сие слышав игумен Иосиф начя им вопреки глаголати, приводя на свидетельство святого преподобнаго Феодосиа общему житию начялника, и святого преподоб­ного Афонасиа Офоньскаго, и святых преподобных отець Ан­тония и Феодосия печерскых чюдотворцов, и иных многих мо­настырей, — еже у них села. Таж и се глагола: «Аще у мана­стырей сел не будет, како чесному и благородному человеку постричися? И аще не будет честных старцов, отколе взяти на митрополию или архиепископа или епископа и на всякие чест­ныя власти? А коли не будет честных старцов и благород­ных, — ино вере будет поколебание». И божьими судьбами на их воле не ссталося. То — первая нелюбка!

Как не стало старца Нила, и ученик его князь Васиян Ко­сой, княж Иванов сын Юрьевича, и начя сей князь велми побарати по своем старце Ниле, еже бы у монастырей не было сел, — и с ним сташа иные старцы, с ними же святогорцы. Се же бысть при великом князе Василье. И князь велики Василей Иванович всея Русии не попусти сему быти, и им мнение на Иосифа же. То — вторая нелюбка!

Тако же навогородцкии еретики начя каятися лестно, а не истинно. И старец князь Васиян поверил им и учал за них печаловатися великому князю, — а с ним и от владык и от стар­цов начаша печаловатися. И сие слышав Иосиф, да написал к великому князю, чтобы лестному их покаянию не верил, ве­лел бы их держати неисходны ис темницы, чтобы иных людей не прельстили. И князь велики Иосифа послушал. То — третья нелюбка! И они стали Иосифа про то укоряти великими уко­ризнами.<…>

Князь же Васьян старець враждовал много на Иосифа и мо­настырь его хотя разорити. И божьими судьбами по мале времени ополелъся на него князь велики и послал его во Иосифов монастырь. Он же в монастыре и преставися, и погребен бысть тамо.

О искони злоначальный враг роду человеческому! Иосиф все благочинье и благоговеиньство снимал с Кирилова мона­стыря, — и се ныне диявол мнением не смирну вражду положи меж таких светил! Во истинну збысться, якоже святии отцы рекоша, яко мнение — второе падение. И паки рекоша: всем страстем мати — мнение.

Послания Иосифа Волоцкого. – М.;Л.: Изд-во АН СССР,1959. – С. 366-369

4. Из сочинений Вассиана Патрикеева1 (20-е гг. XVI в.)

Слово ответно противу клевещущих истинну еуангельскую

и о иноческом житии и устроении церковном

<...> Господь же рече: Аще хощеши съвершен быти, иди и про­дай имениа твоа и даждь а нищим, и прииди и последуй ми. Сиа краткыя глаголы опасне¹ являют иноческое житие; в трех сих съборнейших главизнах съобьемлющи и прочаа вся съставляющаа иноческое житие, рекше, нищету, милостыню и всякое братолюбие и състрадание, к симь же и молитву непрестанну с воздержанием и бодростию. Аще хощеши, рече, съвръшен быти, а не в полу съвершен. Что же есть еже съвръшен быти? Сам Спас инде² научи, рек: Бывайте съвершении, яко же отець вашь небесный съвершен есть. <…>

Господь убо³ глаголеть: Продай же убо имениа твоа. Мы же наша или убо устраяем по заповеди господьской, или ни? Таже в манастырь вшедше, от неразумиа нашего, чюжаа не преставаем всяким образом себе пристяжавати — и села и имениа, ова⁴ убо безстудне⁵ у вельмож ласканием прошаще, ова же искупующе. Таже господье бывша чюжих имений чрез заповедь, велику правду непщуем⁶ и добродетель, еже тщатися всегда умьножити сиа. И глаголавшаго нестяжанием во вслед его поити, и нищетою и правдою, и сего забывше, и вместо еже безмолъствовати и рукоделием своим и трудом питатися, по заповеди, градов безпрестани обьеждаемь и в ру­ках богатых взираем, разным образом ласкающе их и рабо­лепне угаждающе им, даже и возможемь приати у них или деревнишку, или сребришко.

Господь повелевает: И даждь я нищим. Мы же единаче сребролюбием и несытостию побежденыи, живущаа братиа наша убогиа в селех наших различным образом ос­корбляем их, истязанми неправедными обидяще их, и лесть⁷ на лесть и лихву⁸ на лихву на них налагающе, милость же ни­где же к ним показуем; их же егда не возмогуть отдати лихвы, от имений их обнажихом без милости, коровку их и лошадку отъемше, самех же с женами и детми далече от своих предел, аки скверных, отгнахом; неких же и князньскых власти предавше, истреблению конечному подложихом. И иже повелены есмы и своа нищим роздати, даже съвръшении в добродетели будем, мы же, акы своа душа возненавидяще и аки противу заповедей господьских ополчающеся, обидим и грабим, продаваем христиааний, наших братий, и бичем их истязуем без милости, аки звери дивии на телеса их скакающе. <…>

Прение с Иосифом Волоцким

4. Иосиф. Яко подобает еретикы и отступникы святите­лем и священиком и всем православным християном не токмо ненавидети, но и проклинати; царем и князем подо­бает сих в заточения посылати и казнем лютым предавати.

Васиан. Ответ. Яко подобает еретиков святителем и всему священическому собору проклинати, аще котории не каются или паче насилующе съпротивляются; царем же и князем сих подобает заточити и казнити <…> А кающихся повелевает свя­тая писаниа приимати на покаяние. <…>

5. Иосиф. Свидетельство от божественых писаниих, яко едино есть, еже еретикы и отступникы оружием убивати и молитвою смерти предавати.

Васиан. Ответ. Аще речеши, яко едино есть, еже ере­тикы и отступникы оружием убивати и молитвою смръти пре­давати, сие, Иосифе, и с своими ученики облъгуеши святая писаниа. И мы же противу сего речем: Молитвою убивати — от святых есть, а оружием убивати — от царскаго повеления и от человечьскаго се обычая бывает <...>

9. Иосиф. О том, еже Васиан пустынник глаголет: Кото­рых еретиков и отступников казнили, то суть мученицы.

Васиан. Сиа глаголю: Которым еретиком кающимся; не приемля их покаяния, казнили их, сии суть мученицы, по­неже несть грех непрощаем, аще кается. Ты же коея ради вины, о Иосифе, не велиши давати согрешающим покая­ниа? <…>

10. Иосиф. О еже како Нил и ученик его Васиан похулиша великих чюдотворцев Антониа и Феодосия и всех свя­тых чюдотворцев, иже в Печерском манастыре и во всей Руской земли.

Васиан. Сие, Иосифе, на мя и на старца моего лжеши, что будто се мы похулили и всех чюдотворцев во всей Рус­кой земли. Мы же благодатию божиею чюдотворцов киев­ских вублажаем и всех во всей Руской земли, и молитвы их на помощь призываем, и знаменосцы их имянуем, понеже сохранили заповеди божия и жили по Еуангелию и по Апос­толу, а не яко же ты, Иосифе, и твои ученицы, преступив за­поведи божия, не токмо яко мирстии человецы живут, но и греши того <…>

11. Иосиф. О еже како в второе лето князь великий Иван Васильевичь всея Русии повеле быти на Москове святителем, и Нилу и Осифу, попов ради, иже дръжаху наложницы; паче же рещи — восхоте отъимати села у святых црьквей и у манастырей.

Васиан. А о попех о вдовцех, Иосифе, что ми тебе противу вещати? Веси сам в святых правилех, что вдовцем чи­стым повелевает служити. А ты, презрев святая правила, по страсти, человекоугодия ради, отговорил всем вдовцем не служити, и чистым и нечистым. И о том на вашу неправду суд божий на вас лежит, и от святых правил под клятвою есте: преступая правила, тако творите. А о селех: не подо­бает монастырем сел дръжати — о сем писано в 3-м слове сих тетратей. У соборных церьквей у мирскых повелевают святая правила земли дръжати, но не епископу ими владети, ни попом, но все церьковное богатство ведати иконому и давати от него, со епископля доклада, и с всего его священнаго собору попов его, причетником церковным всем комуждо что на потребу, тако же и нищим и убогим, и пле­ненных окупати и всяким в убожестве живущим помогати. Сего ради христолюбци приношают ко церквам соборным мирским своя имениа и богатства. Аще ли будет церьков обидима от кого чим, мьстителем поставленым отмещается. А иноком не подобает богатествовати и земли дрьжати, понеже отреклися сего всего — чюже им есть.

12. Иосиф. О еже како иногда прииде на Москву Васиан пустынник, яко да великаго князя научит и вся благородныя человеки, иже у манастырей и у мирских церьквей села отъ­имати.

Васиан. Сие, Иосифе, на мя не лжеши, что аз вели­кому князю у манастырей села велю отъимати и у мир­скых церквей. И яз пишу и глаголю истину. <…>

14. Иосиф. О еже како Нил и ученик его Васиан гла­голют и пишут, яко не подобает божественых церквей и всечестных икон украшати златом и сребром, тако же и священых сосудов не подобает имети в церкви златых и сребряных.

Васиан. О сем тебе пишу, Иосифе, Иоан Златоустый о сем пишет, яко не подобает церквей украшати, а нищих и убогих обидети, но лучше есть нищим и убогим даяти, не­жели церкви украшати. Понеже церьковные украшение емлемо бывает огнем и варвары, и татьми крадомо. А еже ни­щим даяти, сего ни диявол может украсти. Аще ли будет излишнее у милостыни, по совету убогих церьковнаго богат­ства, и сие подобает творити епископом или мирским чело­веком, а не иноком в монастырех. А иноком в конечном нестяжании и убожьстве и в неукрашении, ниже богатствовати, ни излишняя имати милостыня, но токмо потребная церкви дръжати и неукрашена и себе нужными потребами питати и одежами. <…>

Казакова Н.А. Вассиан Патрикеев и его сочинения. – М.,1960. – С.257-258, 276-281