1. Из послания старца Филофея1 Василию III (между 1524 и 1526 гг. /?/)

Иже² от вышняя и от всемощныя вся содръжащая десница Божия, Имже царие царствуют и Имже велицыи вели­чаются и силнии пишут правду, тебе пресветлеишему и высокостолниишему государю великому князю, православ­ному хрестианскому царю и всех владыц, броздодръжятелю святых Божиих престол святыя вселенския соборныя апостольския Церкве Пресвятыя Богородицы честнаго и славного ея Успения, иже вместо римския и константинопольския просиявшу, старого убо Рима Церкви падеся неверием Аполинариевы ереси; втораго же Рима Константинова града Церкви ага­ряне³ внуцы секирами и оскордъми⁴ разсекоша двери, сия же ныне третьяго, новаго Рима державнаго твоего царствия светая соборная апостольская Церкви иже в концых вселенныя во православнои христианстеи вере во всеи поднебеснеи паче⁵ солнца светитца. И да весть твоя дръжава, благочести­выи царю, яко вся царства православныа христианския веры снидошася в твое едино царство, един ты во всеи поднебес­неи христианом царь.

Подобает тебе, царю, сие дръжати со страхом Божиим. Убойся бога давшего ти сия, не уповаи на злато и богатство и славу, вся бо сия зде собрана и на земли зде остают. <…>

Но и еще царю, исправи две заповеди, еже во твоем царствии не полагают человецы на себе право знамения честнаго креста, о них же издалеча проведыи апостол Павел глаголаше: «Преже писах вам, ныне же плачя глаголю о вразех креста Христова, им же конец пагуба».

Второе да исполниши святыя собраныя Церкви епископы, да не вдовствует святая Божия Церкви при твоем царствии. Не пре­ступаи, царю, заповеди, еже положиша твои прадеды, вели­кии Константин⁶, и блаженыи святыи Владимир и великии богоизбранныи Ярослав⁷ и прочии блаженнии святии, их же корень и до тебе. Не обиди, царю, святых Божиих церквеи и честных монастыреи, еже данное Богови в наследие вечных благ, на память последнему роду. О сем убо святыи великии пятыи Собор страшное запрещение положи <...>

Аз убо грешныи и грубыи во всех и невежда в премудрости, яко же Воламово осля безсловесное словеснаго учаше и скотина пророка наказоваше, яко да не зазриши о сих благочестивыи царю, иже дръзнух писати твоему величеству, и ныне молю тя и паки⁸ премолю, еже выше писах, внимаи Господь ради, яко вся хрестиянская царства снидошася в твое царство, по сем чаем царства ему же нест конца.

Сия же писах ти, любя и взывая и моля щедротами Божиими, яко да премениши скупость на щедроты и немилосердие на милость. Утеши плачющих и вопиющих день и нощь, избави обидимых из руки обидящих. «Не обидите, рече Господь, сих менших верующих в Мя, ибо аггели их видят всегда лице Отца моего, иже есть на небесех». «Блажен, рече, разумеваяи на нища и убога в день лют избавит его Господь. Господь хранит и, живит и, и ублажит его на земли и не предаст его в руки врагом», Господь поможет ти. Да аще¹ добре устроиши свое царство, будеши сын света и граженин вышняго Иерусалима, яко же выше писах ти и ныне глаголю, блюди и внемли, благоче­стивыи царю, яко вся хрестиянская царства снидошася в твое едино, яко два Рима падоша, а третии стоит, а четвер­тому не быти. Уже твое хрестиянское царство инем не оста­нется, по великому Богослову, а християнскои Церкви исполнися блаженного Давида глагол: «Се покой мои в веке века, зде вселюся, яко изволих его»». Святыи Иппалит рече: «егда узрим обстоим Рим перскими вои и перси на нас [с] скифяны сходящася на брань, тогда неблазнено² познаваем, яко тои есть антихрист. Бог же мира и любви и долголетства и здравия молитвами Пречистыя Богоматере и святых чюдотворцев и всех святых, да исполнит твое державное царство.

Синицына Н.В. Третий Рим: истоки и эволюция русской средневековой

концепции (XV-XVI вв.). - М.,1998. – С.358-360