58. Курил және Командор аралдары жайлы қысқаша мағлұмат беріңіз.

Куриль және Комондор аралдары. Куриль және Командор аралдары типтік аралдық доғалар болып табылады. Куриль аралдық доғасы антиклин типті көтерілім, ол екі аралдық доғадан - ішкі Үлкен Куриль қыратынан және сыртқы Кіші Куриль қыратынан - тұрады. Доғалардың созылу бағытына бағыттас және көлденең, тартылған терең жарылымдар бойымен жүзеге асып жатқан тектоникалық қозғалыстар бұл доғалардың бірнеше блоктарға даралануына әкеліп соқтырған. Осы терең жарылымдар олардың бойына шоғырланған жанартаулардың созыла сағалануын қамтамасыз еткен. Куриль аралдары өте жоғары дәрежелі жер сілкіністерімен сипатталады, олардың қарқындылығы Рихтер шкаласы бойынша тоғыз балға жетеді. Куриль-Камчатка белдемі жанартаулар әрекетінің қарқындылығы жағынан бүкіл "Тынықмухиттық отты шығыр" бойындағы ең қарқынды белдем болып табылады. Бұл жанартаулар негізінен андезит-базальтты және базальтты құрамды лавалармен сипатталады.

19-билет

19.Орал–Жаңа Жер қатпарлы облысының пайдалы қазбаларын сипаттап беріңіз. Орал Ресей елінің ең маңызды тау-кен өнеркәсіптік аймақтарының бірі болып табылады. Оның ауқымында алуан түрлі пайдалы қазбалардың мыңдаған кенорындары орналасқан. Бұлардың ішіндегі ең маңыздылары рудалы пайдалы қазбалар, бейрудалы және жанғыш пайдалы қазбалар да бар. Қара металл кенорындарының ішіндегі ең бастысы жапсарлы-метасоматитті типке жататын темір кенорындары. Мұндай кенорындардың жарқын мысалы ретінде Магнитті тау және Оңтүстік Орал аймақтарына шоғырланған кенорындарды атауға болады. Бұл кенорындарды құрайтын рудалар төменгі карбонның әктастары мен порфириттердің бір-бірімен жапсарласу өңіріне шоғырланған. Ұқсас кенорындар Қазақстандағы Рудный қаласының маңында, Орал мен Торғай ойысымының жапсарында белгілі. Титаномагнетит кенорындары габбро формациясымен байланысты ұшырасады. Бұл топтағы ең маңызды кенорын – Качканар кенорны. Марганец және никель. Марганец кенорындары палеозойлық және палеогендік болып екіге бөлінеді. Палеозойлық кенорындар кремнийлі шөгінді таужыныстармен – яшмалармен және фтаниттермен – байланысты қалыптасқан. Мұндай кенорындар Свердловск, Миасс, Магнитогорск қалаларының маңында белгілі. Палеогендік марганец кенорындары палеоцен құмтастары мен саздарына шоғырланған. Бұлардың ірі өкілдері Солтүстік Оралда, Серов–Ивдель қалаларының аралығындағы жолақта шоғырланған. Никель кенорындары серпентинит массивтерімен байланысты қалыптасқан. Никель силикаттары морылу қабатында шоғырланған. Мұндай кенорын өкілдері Верхний Уфалей және Орск қалаларының маңында белгілі. Хромиттер. Хромиттердің өнеркәсіптік кенорындары да серпентинит массивтерімен байланысты қалыптасқан. Ірі кенорындар Қазақстан аумағындағы Мұғалжар жоталарында (Кемпірсай) және Орталық Оралда (Саранск) белгілі. Түсті металдар. Бұл топтағы маңызды пайдалы қазбалардың бірі бокситтер. Боксит кенорындары екі үлкен топқа бөлінеді, олар – теңіз жағдайында түзілген девон түзілімдерімен және континент жағдайында түзілген төменгі бор түзілімдерімен байланысты кенорындар. Орал тауларының шығыс баурайындағы негізгі бокситті горизонт «субров горизонты» деп аталады, ол эйфель түзілімдерінің табанында орналасқан. Ғалымдар ортаңғы девон қимасында 7-ден 9-ға дейін бокситті горизонттар бар деп есептейді. Жоғарыда сөз болған субров горизонты ең басты горизонттардың бірі, ол 50-70 км қашықтықтарға дейін сағаланады, еңістену бойымен есептегендегі тереңдігі 3200-3400 м-ге дейін жетеді. Төменгі бор түзілімдерімен байланысты боксит кенорындры Орал сыртында кездеседі. Олар палееохойдың шайылған бетінде орналасқан, сенонның теңіздік түзілімдерімен көмкеріледі. Мыстың ең ірі кенорындары ортаңғы палеозойдың жасылтасты таужыныстарына шоғырлана отырып, ең басты колчеданды жолақ түрінде созылады. Орталық және Солтүстік Оралда мұндай кенорындар силур түзілімдерімен, ал Оңтүстік Оралда ортаңғы девон түзілімдерімен байланысты (Миасс қаласы орналасқан ендіктен оңтүстікте Сибай қаласына дейін). Мысты-колчеданды кенорындар өздерін кіріктіретін спилит-кератофирлі формациямен бір уақытта қалыптасқан. Колчеданды рудалар көп жағдайда кешенді болып келеді, яғни оларда мыспен қатар, қорғасын, мырыш, алтын және күміс металдарының концентрациясы жоғары. Салауатты (асыл) металдар. Оралда платинаның кенорындары белгілі. Платина офиолитті формациямен, яғни габбро-перидодит-дунит формациясына тиесілі ультранегізді таужыныстармен байланысты ұшырасады. Мұндай интрузиялар Ортаңғы және Солтүстік Оралдың шығыс баурайында көрініс береді. Ал алтынның өнеркәсіптік кенорындарының көпшілігі гранит және гранодиорит интрузияларымен, сол сияқты желілік таужыныстармен (аплиттермен, кварцты порфирлермен) байланысты. Алтын кварцты желілерде сеппелер мен жекелеген ұяшалар түрінде ұшырасады. Алтынды шашылымдар да маңызды рөл атқарады, шашылымдардың төрттік түзілімдермен байланыстылары да, көне шашылымдар да (ертепермдік, юралық, неогендік) ұшырасады. Сирек металдардың (вольфрамның, мышьяктің, сүрменің, сынаптың, иридийдің, осмийдің, ванадийдің) кенорындары қышқыл құрамды интрузиялармен байланысты қалыптасқан. Бейруда шикізаттар. Әлемдік маңызы бар кенорындар санатына құнды отқа төзімді шикізат болып табылатын магнезит кенорындары жатқызылады, бұл кенорындар рифейдің шөгінді таужыныстарымен байланысты қалыптасқан (Сатка, Катав-Ивановск қалаларының маңында). Талшықтастың (асбестің) қоры жағынан және оны өндіру қарқыны жағынан Орал дүние жүзіндегі алдыңғы қатарлардың бірін иеленеді. Бұл кенорындар Орталық және Солтүстік Оралдың серпентинит массивтерімен байланысты. Калий тұздары мен ас тұзының кенорындары жоғарғы пермь шөгінділерімен байланысты, бұл кенорындарды кіріктіретін таужыныстар жолағы Орал алды ойысымы бойында Соликамск қаласынан Соль-Илецк қаласына дейін созылады. Кунгур жікқабатына тиесілі гиас кіріктіретін түзілімдер солтүстікте Чердынь қаласынан оңтүстікте Соль-Илецк қаласының аралығында ұшырасады. Энергетикалық шикізаттар. Тас көмірдің айтарлықтай қорлары Кизыл аймағында ұшырасады. Орал жоталарының шығыс баурайында Алапаев-Каменск, Полтава-Бредин, Домбровск және Бершоғыр көмірлі аудандар ұшырасады. Көмір кіріктіретін түзілімдер қарқынды қатпарланған, ал олардың құрамындағы көмір қабаттары қарқынды метаморфтық өзгерістерге ұшыраған, кейбір жерлерде олар тіпті графитке айналып кеткен. Пермь жүйесіне тиесілі көмір қабаттары кунгур жікқабатымен және жоғарғы пермнің континенттік түзілімдерімен байланысты қалыптасқан. Мұндай көмір кенорнының жарқын өкілі – Воркута алабының көмірлері. Трас пен юраға тиесілі қоңыр көмір кенорындары Орал жотасының батыс баурайында да, шығыс баурайында да ұшырасады. Шымтезек кенорындары Нижний Тагиль, Свердловск және Верхнекамск аудандарына шоғырланған.

39.Скиф және Тұран тақталары ауқымында табылған көмірсутек кенорындарының геологиялық позициясын сипаттаңыз. Скиф тақтасының ең басты пайдалы қазбалары – мұнай, газ және газды конденсат. Карпинский қырқасының Каспий теңізімен жапсарласатын шығыс бөлігінде 20-ға жуық шағын-шағын газ және газды конденсат кенорындары ашылған. Бұл кенорындардағы газ және газды конденсат жатындарын кіріктіретін өнімді горизонттар – жоғарғы юраның карбонатты таужыныстары және бор жүйесінің терригендік түзілімдері. Теріс-Каспий шеткі ойысымының Кавказ маңына сәйкес келетін жапсарында, Грозный қаласының маңында 30-ға жуық құрылысы өте күрделі мұнай және газды конденсат кенорындары ашылған. Бұлардың ішіндегі ең ірісі – Грозный кенорны. Бұл кенорындардағы көмірсутектердің негізгі қорлары төменгі бор, палеоген және неоген түзілімдерімен байланысты. Осы өңірдің солтүстік жағында орналасқан Ставрополь көтерілімімен жапсарласатын Шығыс Маныч ойысымының ауқымында 50-ге жуық шағын-шағын мұнай кенорындары белгілі, бұлардың өнімді қатқабаттары төменгі бор кешеніне және ортаңғы юраның базалық кешеніне сәйкес келеді. Ал Ставрополь көтерілімінің өзінің ауқымында 15 газ және газды конденсат кенорындары ашылған, бұлардың өнімді горизонттары палеоген кешендеріне сәйкес келеді (негізінен майкоп сериясына қарасты құм будалары). Азов-Кубань ойысымының шығыс бөлігінің ауқымында 100-ге дейін ірілі-ұсақты газ және газды конденсат кенорындары табылған.

Тұран тақтасының пайдалы қазбалары. Тұран тақтасына тиесілі шөгінді тыс қабатының басты байлығы – мұнай, газ және газды конденсат кенорындары. Оңтүстік Маңғыстау және Оңтүстік Бозащы ойысымдарында ортаңғы және жоғарғы юра түзілімдерінен, сол сияқты төменгі бор шөгінділерінен (негізінен неоком-апт түзілімдерінен) көмірсутектердің бір топ ірі және орташа мөлшерлі кенорындары ашылған. Мұндағы өнімді горизонттар аралық қабатқа ғана емес, неоком және юра шөгінділеріне де молынан шоғырланған. Бұхар баспалдағы мен Ферғана ойысы аумағында бір топ газ және мұнай кенорындары юра, бор және азын-аулақ дәрежеде палеоген түзілімдері қимасынан табылған. Сол сияқты, газ кенорындары Орталық Қарақұм дөңесінің юралық түзілімдері қимасынан анықталған. Мұнай кенорындары Оңтүстік Торғай ойысымында, шағын-шағын газ кенорындары Шу-Сарысу ойысында белгілі.