Серамбана кывбур

Математикаысь «два»,

Да и коми кывйысь «два».

Гортын петкöдласны пуж!

Мый нö тайö?

Е. Козлов

– Кыдзи тіянöс бать-мамныд öлöдöны дыша да лёка велöдчöмысь?

Гижöй висьтсö III морт нимсянь. Индöй кадакывъяс. Сетöй висьтыслы ним.

Öтчыд ми ёрткöд вöчим лэбач поз и тувъялім сійöс öшинювса джуджыд коз йылö. Медводдза скворечьяс зэв зіля заводитлісны поздысьны, но сэсся и волынысö дугдісны.

Öти шоныд гажа лунö миян керка дорö локтіс зэв мича гöрд ур. Ми вöтчим сы бöрся. Ур зэв öдйö кавшасис коз йылö да дзебсис лэбач позйö.

Кутім водзö видзöдны ур бöрся. Вöлöмкö, сэні олö урлöн быдса семья. Урпиян чеччалісны пу вожсянь пу вожйö, гажöдчисны ас ногныс.

Ми зэв дыр видзöдім налöн ворсöм бöрся. Тадзи уръяс мырддисны скворечлысь позсö.

Лыддьöй мойдкывсö. Индöй кадакывъяссö да торйöдöй кыв йывъяссö, висьталöй кадакывъяслысь наклонениесö. Объяснитöй торйöдöм кывъяслысь гижанногсö.

Джыдж.

– Джыдж, джыдж, кытчö ветлін?

– Сус коль сёйны ветлі – виньді.

Ва юи – польді,

Паччö вылö кайи – мышку сотчис.

Гöбöч вылö чеччышті – кокöй желлясис.

Улö чеччышті – кокöй чеги.

Пу кок вöчи – сісьмис.

Лы кок вöчи – пон сёйис.

Из кок вöчи – ворсігöн поті.

Кöрт кок вöчи – потшöс вылö чеччышті,

«Джыдж, джыдж», – шуи.

Велöдчöм йылысь шусьöгъяс.

Велöдчöм морт – синма, велöдчытöм – синтöм.

Сійöс велöны – ловпу нюкыльтны.

Быдтор дорö колö велöдчыны.

Велöдчöмаыд мышкас гöб оз вöч.

Велöдчан кö, кужöмлунтö нопйын оз ков кыскавны.

Том йöзыдлы велöдчöмыд кынöм сюмалöм моз колö.

Ов да выв да век велöдчы.

Ыжпаса кырымнад ылöдз он во.

Кужысьöс оз ков велöдны.

Мортыд кымын уна тöдö, сымын сылы уна колö тöдны.

Велöдчытöгыд мортö он во.

Велöдчан кö – морттуй шедö.

Велöдчöм йылысь анекдотъяс.

Заводитчис урок. Лена сёрмис. Торкöдчö. Пырö. Велöдысь зэв стрöгысь:

– Лена, заходи быстрее. У тебя еще стихотворение на носу.

* * *

Математика урок вылын Надежда Николаевна юасьö велöдчысьлысь:

– Тася, кутшöм дрöбъяс овлöны?

– Обыкновеннöй.

– А ещё?

– Необыкновеннöй...

И ставöн серöктісны.

* * *

Наталья Викторовна гижö дöска вылö 0,02 да тшöктö лыддьыны. Дима Кетов лэптö ки:

– Ноль целых ноль вто­рых.

* * *

Коймöд классын пуктöны «Разудалый петушок» мойд. Вася ворсö петушокöс. Мойдын петук аддзö пöжар да кöсйö горöдны: «Ку-ка-ре-ку!» Но сылöн зэв гораа горöдсьö:«И-го-го!»

* * *

Логинов Коля висьтавлö урок вылын слöн йылысь.

– Слон очень сильный. У него есть длинный хобот. Он им тас­кает бревна, а еще он своим хоботом машины трумбликает.

* * *

Васяясö локтісны гöсти братанъясыс (найö рочöсь). Вася пукалö паччöр вылын да горзö:

– Толя, иди сюда на паччöр!

* * *

Настя пырис гортö да гораа юöртіс мамыслы:

– Мам, миян регыд лоö ветеринаръяскöд аддзысьлöм.

– Кутшöм ветеринаръяскöд?

– Кутшöм, кутшöм, – неокотапырысь вочавидзис Настя, – да кодъяс тай война вылын тышкасисны.

* * *

Пызан сайын пукалöны бать, мам, Вася да Лена. Сёйöны. Радио пыр мунö композиторъяс йылысь передача.

– Васик, – шыасьö бать пи дорас, – тэныд Шуберт либö Бах кажитчöны?

– Хи-хи-хи, – заводитіс серавны Лена. – Васик, батьыд бара тэнö пöрйöдлö. Ме думысьу некоднансö оз сёйны...

И батьлöн чужöм вежыньтчис.

* * *

Вася локтіс гортö да зэв сьöлöмсянь заводитіс сёрнипны мамыскöд:

– Мам, кыдз тэ думайтан, енмыс эм али абу? Ме думысь, абу.

– Мыйла? – Юасьö мам.

– Да ме «3» вылö гижи диктантсö коми кывйысь. Кор ме сійöс гижи, сэки век шуалі. «О, господи, енмöй. Тэ кö эм, мед жö ме гижа «4» либö «5» вылö». А кор локтіс велöдысь да шуис, мый менам «3», ме дзик жö пыр думышті, мый енмыс абу.

* * *

Коми литература урок вылын велöдысь öшöдіс И. А. Куратовлысь портретсö да юаліс:

– Челядь, коді меным висьталас, коді тайö?

Андрей зэв öдйö лэптіс кисö:

– Валентина Фёдоровна дöска вылö öшöдіс Иван Алексеевич Куратовöс.

* * *

Челядь роч литература вылын лыддисны «Чук и Гек». Велöдысь юасьö:

– Кодкöд локтіс станция вылö Чуклöн и Геклöн батьыс?

Ставöн горöдісны: «Ёртъяскöд!» Сэки Андрей лэптіс кисö:

– Ме думысь, бурджык лоö, шуам кö, мый батьыс локтіс соперникъясыскöд!

* * *

Паныдасисны кык детинка:

– Кывлін, лунвывса öти мортлы 141 во тырöма.

– Мый чуймин? Менам дед кö öнöдз оліс, то вöлі нин эськö ёна пöрысьджык

* * *

Школаын.

– Висьтав, Коля, коді решитіс тэныд тайö задачасö батьыд али мамыд? – юалö велöдысь.

– Ог тöд. Ме сэки ывлаын ворсі.

* * *

– Яндысь, – шуис батьыс пиыслы,– кор ме вöлі тэ арлыда, некор эг пöръясьлы.

– А кор заводитін? – юаліс пиыс.

Мичаа лыддьöй кывбурсö.

Мыйла велöдысьöс кывбуралысь шуöма мöд мамöн?

Мöд мамъяс.

Колö лоны стрöгöн, Колö лоны рамöн, Колö асьтö сідзи кутны пыо, Медым тэнö быдöн Шуисны мöд мамöн, медым тэнö помнитісны дыр. Медводдза учитель, Том кöть тэ, кöть пöрысь, Быдöнлы тэ муса, Быдöнлы тэ ас Тэ йылысь бур думъяс Нэм чöж видзам сьöрын, Тэ ö медводз индан Олöм туйö пас. Овлö тэныд сьöкыд,

Овлö тэныд мустöм. Пинявлан и быдöн Коркö бöрйöм удж. Но мый öзтін мортын, Некор нин оз чусмы, Сы вöсна мый тэнад Сьöлöмыд зэв нюдз. Медым тэнö быдöн Шуисны мöд мамöн – Тайö вывті сьöкыд, Но и вывті бур! – Колö лоны стрöгö, Колö лоны рамöн – Мöд ног тайö нимыс Некодлы оз сюр.

Н. Щукин

– Кутшöм тэнад «мöд» мамыд? Серпасав сійöс.