Nәql olunmuş rәvayәtlәrdә hәsәd vә hәsәd edәn şәxslәr haqda

Peyğəmbər (s)-dan nəql olunur ki, Allah-taala Musa (ə)-a xitab edərək buyurur:

Ey Imran oğlu! Camaata verdiklərimə göz dikib həsəd aparma və nəfsini [gördüklərinə] tabe etmə. Çünki, həsəd aparan şəxslər verdiyim ne᾽mətlərdən narazı qalıb bəndələrim arasında böldüyüm ne᾽mətləri əldə etmək istəyər.¹

Peyğəmbər (s) səhabələrə müraciət edərək buyurur:

«Allahın ne᾽mətlərinə təcavüz etməyin»

Səhabələr soruşdu:

«Ya Rəsuləllah, kimlər Allahın ne᾽mətlərinə təcavüz edərlər?

Buyurdu:

Başqalarına həsəd aparan kəslər.²

Әli (ə) buyurur:

Həsəd sağalmayan bir xəstəlikdir.³

Həsəd ruhun zindanıdır.⁴

Həsəd xəstəliklərin ən ağırıdır.⁵

Həsəd pisliklərin mənbəyidir.⁶

Həsədin verdiyi səmərə dünya və axirət bədbəxtçiliyidir.⁷

Həsədi tərk edənlər insanların ən sevimlisidir.⁸

Həsəd aparan şəxslərə gəldikdə isə, Әli (ə) buyurur:

Həsəd aparan şəxslər bol-bol həsrət çəkər və neçə bərabərində günaha düçar olarlar.⁹

Həsəd aparan şəxslər heç vaxt faydalanmazlar.¹⁰

Həsəd aparan şəxslərə insanların malik olduqları ne᾽mətləri itirmələrindən başqa heç nə rahatlıq gətirmir.¹¹

Həsəd aparan şəxslər başqalarının qəm-qüssəsində sevinər, onların sevincində isə kədərlənərlər. (Mustədrək, 12-ci cild, 55-ci fəsil, 13401-ci hədis).

Həsəd aparan şəxslər hər hansı bir şəxsin nə isə əldən verməsini özünə qənimət hesab edər.¹

Həsəd aparan şəxslər dostluğunu dildə aşkar edər, düşmənçiliyini isə qəlbində gizli saxlayar. Bunun üçün də onların adı dost, xisləti isə düşməndir.²

Dostların ən pisi həsəd aparan şəxslərdir.³

Imam Sadiq (ə) həsəd aparan şəxslər barədə buyurur:

Paxıl və xəsislər heç nədən rahatlıq tapmadıqları kimi, həsəd aparan şəxslər də heç nədən ləzzət almazlar.⁴

Həsəd aparan şəxslər Iblis kimi ziyanı başqalarına vurmazdan əvvəl özlərinə vurarlar. Belə ki, o, Adəmə həsəd aparmaqla özünün lə᾽nətlənməsinə, Adəm (ə)-ın isə peyğəmbərliyə seçilməsinə səbəb oldu.⁵

Küfrün əsasını üç şey təşkil edir: Təkəbbür, həsəd və tamah.⁶

Həsədin əsasını Allahın fəzl və kəramətini inkar etmək təşkil edir. Bu iki şey küfrün qanadlarıdır. Adəm övladının əbədi həsrətə və bir daha nicat tapmamasına səbəb olan şey məhz həsəd oldu.⁷

Bu məzmunda nəql olunmuş digər rəvayətlərdə həsəd, imanı zəiflədən və cismi sağlamlığa xələl gətirən amillərdən biri hesab olunur.

Әli (ə) bu haqda buyurur:

Başqalarına həsəd aparmayın. Alov odunu yandırdığı kimi, həsəd də imanı məhv edib aradan aparır.⁸

Qar suda əriyib yoxa çıxdığı kimi, həsəd də imanı qəlblərdə əridib məhv edir.

Həzrət Peyğəmbər (s) səhabələrə etdiyi tövsiyələrin birində buyurur:

«Agah olun ki, sizdən əvvəlki ümmətin sorağına gələn xəstəlik (həsəd), sizin də sorağınıza gəlmişdir. O, sizin başınızdan bir tük də əskik etməz, lakin dininizi məhv edib aradan aparar.¹

Imam Sadiq (ə) buyurur:

Dinə xələl gətirəcək şeylər həsəd, xudbinlik və özünü başqalarından üstün tutmaq hissidir.²

Әli (ə) həsədi cismi xəstəlik, onun tərk olunmasını isə sağlamlıq hesab edir. Bu haqda buyurur:

Həsəd aparan şəxslər daim xəstə olarlar.³

Həsəd cismi süst və zəif edər.⁴

Həsəd aparan şəxslərin sağlamlıqdan xəbərsiz olmaları çox qəribədir.⁵

Cismi sağlamlıq həsədin azalmasından asılıdır.⁶