Bağışlanma istəyi

İmam Baqir (ə) buyurur: “Atam qulamını bir iş ardınca göndərmişdi. Qulam yubanmışdı. Həzrət ona bir çubuq vurdu. Qulam dedi: “Ey ağam, məni iş dalınca göndərib, sonra kötək vurursan!” Atam ağladı və dedi: “Övladım! Get peyğəmbərin qəbrini ziyarət et və iki rəkət namaz qıl. Sonra de: “Pərvərdigara! Əli ibn Hüseyni Qiyamət günü bağışla.” Get səni Allah yolunda azad etdim!” Əbu Bəsir deyir: Həzrətə dedim ki, sənə fəda olum, məgər qamçının kəffarəsi azad etməkdir?” Həzrət susdu.⁵¹⁷

Qamçı əvəzinə qamçı!

İmam Riza (ə) buyurur: “Əli ibn Hüseyn (ə) bir gün səhvinə görə qulamını vurdu. Sonra evə daxil olub əlində qamçı bayıra çıxdı. Köynəyini çıxarıb qulama dedi: “Al bu qamçını Əli ibn Hüseyni (ə) vur!” Qulam bu işə cəsarət etmədi. İmam ona əlli dinar pul bağışladı.⁵¹⁸

Ananın haqqı

İmam Səccada (ə) dedilər: Siz insanların ən xeyirxahısınız. Amma ananız istədiyi halda onunla bir qabdan xörək yemirsiniz!” Həzrət buyurdu: “Qorxuram ki, anamın götürmək istədiyi tikəyə əl uzadım və nəticədə ağvalideyn olum.” Həmin vaxtdan başlayaraq anası ilə bir qabdan xörək yemək üçün qabın üstünü örtər və örtük altdan tikə götürərdi.⁵¹⁹

Borca görə zəmanət

İsa ibn Abdullah deyir: Abdullahın ölüm məqamı çatdı. Borclular qapıya yığışdı. Onlara dedi: “Sizə verməyə bir şeyim yoxdur. Əgər razılaşsanız borclarımı əmioğlanlarım Əli ibn Hüseyn və Abdullah ibn Cə’fər ödəyər.” Borc sahibləri dedilər: “Abdullah ibn Cə’fər uzun və’d verən və səhlənkar adamdır. Əli ibn Hüseynin bir şeyi olmasa da doğruçudur. Bu işi onun görməsi daha münasibdir.” Xəbər həzrətə çatdı. Buyurdu: “Mən zamin dururam ki, taxıl məhsul verəndə borcu ödəyərəm.” Həzrət və’d verdiyi vaxt Allahın tövfiqi ilə və’dinə əməl etdi.⁵²⁰

Misilsiz qardaşlıq

Bir şəxs imam Səccadı təhqir etdi. Ətrafındakılar həmin adamı cəzalandırmaq istədilər. Həzrət buyurdu: “Onu azad buraxın. Bilmədiyimiz səhvlər dilə gətirilən səhvlərdən çoxdur.” Sonra həmin kişiyə buyurdu: “Ehtiyacın var?” Kişi xəcalət çəkdi. Həzrət libasını ona bağışladı. Göstəriş verdi ki, ona min dirhəm pul versinlər. Kişi haray çəkdi. Şəhadət verirəm ki, sən Allah rəsulunun oğlusan!”

Qeybətə münasibət

İmam Səccad (ə) onun qeybətini edən bir dəstə adamla rastlaşdı. Onlara yaxınlaşıb dedi: “Əgər dedikləriniz doğrusa, Allah məni bağışlasın, əgər yalan deyirsinizsə, Allah sizi bağışlasın!”⁵²¹

Bilmədən qətl

İmam Səccadın (ə) bir neçə qonağı vardı. Həzrət xidmətçisinə göstəriş verdi ki, yubanmadan qızardılmış ət gətirsin. Xidmətçi qızarmış əti dəmir qabda gətirərkən onu əlindən saldı və qab aşağıdakı təbəqədə həzrətin övladına dəyib onu yaraladı. Nəticədə körpə dünyasını dəyişdi. İmam qorxudan titrəyən xidmətçiyə buyurdu: “Sən bu işi bilərəkdən görməmisən. Buna görə də səni Allah yolunda azad edirəm.” Sonra imam övladının dəfni ilə məşğul oldu.⁵²²

İxlasın zirvəsi

İmam Səccadın (ə) yoxsul bir əmioğlusu vardı. İmam gecələr tanınmayan bir qiyafədə onun qapısına gedib pul verərdi. Həmin şəxs adi vaxtlar deyərdi: “Əli ibn Hüseyn (İmam Səccad (ə)) mənə yardım əli uzatmır. Allah mənə görə ona xeyir verməsin.” Həzrət əmioğlusunun yersiz sözlərini eşidib səbr edər, gördüyü işi açıqlamazdı. İmam dünyasını dəyişərkən əmioğlusu gizli yardımların kəsildiyini görüb anladı ki, həmin şəxs imam Səccad (ə) imiş! O imamın qəbri üstünə gəlib hönkürtü ilə ağladı.⁵²³