Səmavi kitablarda Əhli-beyt (ə) mövzusu Qur’an baxımından Əhli-beyt (ə)

Heç şübhəsiz, Qur’ani-məciddə bəyan olunmuş iman, cihad, ixlas, yəqin, gözəl əxlaq, saleh əməl, gündəlik ibadət, gecə ibadəti, sədaqət, vəfa, kərəm, səxavətin kamil nümunəsi Əhli-beytdir (ə). Bu həqiqət şiə və sünni kitablarında təsdiqlənir. Uyğun mənbələrdə təsdiqlənir ki, həzrət Əli (ə) və Əhli-beyt (ə) haqqında ayələr nazil olmuşdur. Şiə və sünni kitablarında bu həqiqətin əks olunması şübhəyə yer qoymur.

Qur’an Əhli-beyt (ə) vücudunun kökü olan Peyğəmbər (s) haqqında aşkar bəyanatlar verir, onun ayələrində müxtəlif məqamlarda Əhli-beytə (ə) işarə olunur. Çünki Qur’an ağıl və düşüncə sahiblərinə üz tutur. Batini nur, rəvayətlər və dəqiq düşüncə ilə insan anlayır ki, uyğun ayələrin İslam ümməti arasında yeganə gerçək nümunəsi Əhli-beytdir (ə). Bu ayələrdən bə’zilərini Əhli-beytdən (ə) başqa ünvana yozmaq mümkünsüzdür. Əgər həmin ayələrdə ünvan olaraq Əhli-beyt (ə) götürülməsə, onların anlaşılmaz qaldığını qəbul etməliyik. Bu isə Qur’an üçün nöqsan olardı. Qur’anın anlaşılmazlığına e’tiqad küfrə bərabərdir və Qiyamət əzabı ilə sonuclanır. Qur’anda oxuyuruq: “Onların həqiqi təfsirini Allahdan və elmə varanlardan qeyrisi bilməz...”³⁴¹ İmam Sadiq (ə) buyurur: “Rasixun” tə’birinin ünvanı bizik. Ayələri olduğu kimi açıqlayan da bizlərik.”³⁴²

Qur’anda peyğəmbər şəxsiyyəti

Qur’ani-məcid Peyğəmbərin (s) əzəmət və şəxsiyyətini açıq şəkildə bəyan edir: “Həqiqətən Allah və onun mələkləri Peyğəmbərə (s) salam göndərir...”³⁴³

Rəvayətdə bildirilir ki, Allahın salamı onun peyğəmbərə xüsusi rəhmətini, mələklərin salamı peyğəmbər üçün mərhəmət istəyini bildirir.³⁴⁴ Qur’ani-məcid Peyğəmbəri (s) o qədər yüksək dəyərləndirir ki, ona bey’əti özünə bey’ət sayır: “Şübhəsiz, sənə bey’ət edənlər Allaha bey’ət etmişlər.”³⁴⁵

Allah və onun peyğəmbərinə itaət

Qur’an meyvəsi dünya və axirət səadəti olan Allah və Onun rəsuluna itaət haqqında buyurur: “Hər kəs Allah və Onun rəsuluna itaət etsə, şübhəsiz, böyük qurtuluşa çatar.”³⁴⁶ Qur’ani-məcid Allah və Onun rəsuluna itaətin Qiyamətdə peyğəmbərlər, siddiqlər, şəhidlər və ləyaqətlilərlə yoldaşlığa aparacağını bildirir: “Allah və onun rəsuluna itaət edənlər Allahın ne’mət verdiyi peyğəmbərlər, siddiqlər, şəhidlər və layiqlilərlə bir zümrədə olar.”³⁴⁷

Qur’ani-kərim peyğəmbərə itaəti Allaha itaət sayır. Bu ayə peyğəmbərin bütün insanlardan üstün olduğunu göstərir. Ayədə oxuyuruq: “Peyğəmbərə itaət edən əslində Allaha itaət etmişdir...”³⁴⁸

Qur’ani-kərim Allah və Onun rəsuluna itaəti behiştə giriş səbəbi sayır. İnsan Allah və Onun rəsuluna itaətsizlik səbəbindən ağrılı əzaba düçar olur. Qur’anda oxuyuruq: “Allah və Onun rəsuluna itaət edən insan ağacları altdan çaylar axan behiştlərə gətirilər. Üz çevirən insana ağrılı əzab daddırılar.”³⁴⁹

Qur’ani-kərim peyğəmbərə itaəti ilahi mərhəmət səbəbi kimi tanıtdırır: “Bu peyğəmbərə itaət edin ki, Allahın mərhəmətinə çatasınız.”³⁵⁰ Buşr ibn Şüreyh Bəsri deyir: İmam Baqirə (ə) dedim ki, Qur’anın hansı ayəsi daha çox ümidvericidir? Həzrət buyurdu: “Sənin qövmün bu barədə nə deyir?” Dedim: “Ey mənim bəndələrim, özünüzə münasibətdə ifrat etdiniz, Allahın rəhmətindən ümidinizi üzməyiniz” ayəsini ən ümidverici sayırlar. İmam (ə) buyurdu: “Biz Əhli-beyt (ə) belə demirik. “Tezliklə Rəbbin sənə bəxşiş edəcək ki, razı qalasan” ayəsi ən ümidverici ayədir. Bəxşiş dedikdə and olsun Allaha, şəfaət nəzərdə tutulur.”³⁵¹

Rəvayətdə deyilir: Peyğəmbərin istəyi Əhli-beyt (ə) və şiələrin behiştə gətirilməsidir.”³⁵²