6. Панорамалық сабақ.

Бұл – оқушыларды оқыту ісінің формасы емес, мұғалімдерге жаңа әдістемені таратудың жүйесі, яғни, мұғалімдер немесе әдіскерлердің мұғалімдерге өткізген сабағы. Панорамалық сабақтың тағы бір қолданар аумағы деп әдіскерлердің мұғалімдерге көмек беру құралы ретінде пайдалануын айтамыз.

Панорамалық сабақ мына мақсаттарды шешеді:

а) Озат мұғалімдердің өзінің ұстаздық лабораториясын ашып, сабақ беруі, яғни әдістемесін көпке тарату.

ә) Әдістемелік немесе мектеп басшыларының мұғалімдерге әдістемелік көмек беру, сабақты ұйымдастыру тәсілін көрсету.

Панорамалық сабақты өткізуші мұғалімдерге қойылатын ең бірінші талап – оның сабақ өтуде өзгелерге ұқсамайтын өзіндік тәсілдерінің болуы. Мұғалімнің оқыту үрдісінде ең көп сүйенетін әдісі қайсы, оның тиімділігі неде? Міне, панорамалық сабақты тыңдаушы әрбір мұғалім соны біліп, сезінуі керек. Сондықтан панорамалық сабақ мұғалімдердің жаңа әдісі жарқырай көрінетіндей дәрежеде құрылуы тиіс.

Панорамалық сабақта тек мұғалім әрекеті ғана көрініс таппауы тиіс. Сонымен қатар оның шәкірттерінің іс-қимылы, білімді игеру жөніндегі белсенді жұмысы анық сезілуі керек. Көп жерде панорамалық сабаққа қойылатын талап ретінде сабаққа қатысып отырған мұғалімдерді оқушы ретінде пайдалану тәжірибесі қойылып жүр. Бұл талапты орындау көпжақты жеміс береді. Атап айтсақ:

1. Мұғалімдердің оқушылармен ынтымақтаса жұмыс істеу тәжірибесін көрсетеді.

2. Оқушы ретінде қатысушы мұғалімдерге әріптестің тәжірибесін игеруін оңтайлатады.

Панорамалық сабақтың үшінші ерекшелігі – оқушылардың белсенді әрекеті. Жай сабақтарда мұғалім көбірек сөйлейтін болса, бұл сабақта керісінше. Ол үшін мұғалім сабақты өтпес бұрын, жаңа өтілетін тақырыпты мазмұнына қарай бірнеше тақырыпшаларға бөледі. Мұнан соң, осы тақырыптардың әрбірін түсінуге көмектесетін оқулықтар, анықтамалар, баспасөз материалдарын жинақтап алып, оны әрбір тақырыпқа жүйелеп, сол тақырыпты игеруге тиісті оқушыларға бөліп беруі керек. Оқушылардың материалдар бойынша өз түсінігін қалыптастыруына 20 минуттай уақыт беріледі. Содан соң мұғалім тақырыптың реті бойынша әрбір оқушыны кезегімен сөйлетеді. Сабақта мұғалім тек дирижер қызметін атқарады. Оқушылар белсенді жұмыс істеп, сабақты өздеріне өздері түсіндіріп шығады.

Мұндай сабақтар оқушыларды сауатты жазуға, мәдениетті сөйлеуге жан-жақты ойлануға, өз бетінше ізденуге баулиды. Оқушылардың ізденушілігін, жауапкершілігін, жұмыс істеу қабілетін арттырып, шығармашылық жұмыстар жасауға бейімдейді. Болашақта өзі таңдайтын мамандығының іргетасын қалайды.