Документы

содержание ^

Договор Пскова с Ливонией 1509 г.

По божией воле и по великого государя веленью царя русского Василья божиею милостию царя и государя всеа Русии и великого князя Владимерского и Московского и Новгородцкого и Псковского и Тферского и Югорского и Пермъского и Блъгарского и иных. Се приехаша в великого государя и царя русского отчину в Великий Новгород к великого господаря и царя русского к наместником к новугородцким ко князю Данилу Васильевичу и к Григорью Феодоровичю из великого государя и царя русского отчины из Пскова от великого государя и царя русского наместника князя псковского Ивана Михайловича и от посадников псковских степенных и от старых посадников и от всего Великого Пскова отчины великого государя и царя русского послы псковские посадники Михаило Юрьевич Ледов, Александр Степанович Киверников, Григорей Яковлич Котлов да бояре псковские, Иван Харитонович Пученкин староста купецкий, и владычнь наместник Василей Игнатьевич Галкин, Алексей Михайлович старой дияк городцкой и Яков Ермолин староста гостевной и городской дияк Захарья. А также приехаша от честного князя Лифленьского от Волтер ван Плетенберг послы княж местеровы Иван Гилдорп да мистр Иван Олдензей кенселар. И прикончяше перемирье с послы псковскими отчины великого государя и царя русского с посадники псковскими и бояры на четырнатцать лет от Благовещеньева дни лета семь тысяч семаго на десять до Благовещеньева дни лета семь тысяч тритцать перваго за князя местера Лифленьского и за арцибискупа Ризского и за их князи и за их золотоносци и за их земных бояр и за посадников и за ратманов и за все их городы и за всю местерову дръжаву и за арцибискупову.

1. А в ту четырнатцать лет по сей грамоте сей мир дръжати крепко на обе стороны. А великого государя и царя русского наместнику князю Псковскому и отчине его Пскову в ту четырнатцать лет княж местеровы дръжавы и арцибискуповы не воевати, ни зацепляти ничем, ни на земли ни на воды их не наступати. Также князю местеру и арцибискупу изо всех их дръжав в ту четырнатцать лет великого государя и царя русского отчины Псковские земли не воевати ни зацепляти ничем, ни на земли ни на воды ни наступати.

2. А земле и воде промеж Пскова и князя местера и арцибискупа старой рубеж по старым грамотам. А озеро Великое ловити псковичем к своему берегу. А за озеро Великое псковичем ловити не ездити на немецкую сторону. А станет по грехом изнеможенье — занесет ветром псковского ловца на немецкую сторону, ино в том пени нет. Также и немцем озеро Великое ловити к своему берегу. А за озеро Великое немци ловити не ездити на псковскую сторону. А по грехом станет изнеможенье — занесет ветром немецкого ловца на псковскую сторону, ино в том пени нет. А во Пскове озеро немцем ловити не ездити. А на Клицно остров немцем не наступати же. А межа промеж Псковом и князя местера по Норове реке стержнем.

3. А что вотчина великого государя Псков били челом Василью божиею милостию царю и государю всеа Русии и великому князю о том, что де имати [о]стровы, и арцибикупли люди вступилися во псковские земли через старой рубеж, и великого государя наместником новгородским на ту землю послати судей на съезд, а великого государя наместнику князю псковскому и вотчине великого государя Пскову с магистром и с арцибискупом учинивши срок, да на ту землю послати людей честных на съезд. А магистру и арцибискупу к тому сроку на ту землю послати своих людей честных на съезд. И те судьи великого государя и люди добрые с обеих сторон, на ту землю съехався да обыскав по крестному целованью, учинят земле и воде рубеж по старым перемирным грамотам и по сему крестному целованью. А вперед на чужую землю и воду не полости на обе стороны. А хто с которые стороны полезет на чюжию землю или на воду, ино тому живота не дати.

4. А из великого государя царя русского отчины из Псковские земли гостя и купцов по магистрове дръжаве и по арцибискупле земле и по бискуплим землям на Ригу и на Колывань и на Ругодив и во все городы Лифленские земли горою и водою путь им чист приехати и отъехати без всякие зацепки, и купити и продати добровольно всякой товар без вывета, опричь соли. Да и на Матерую реку псковичем торговати ездити по старине. И на розницу или вместе товар свой псковичем продавати добровольно во всех городех Лифлянские земли. И дрова псковичем на Матерой реке в лесе, и всякой запас, что надобе, сечи добровольно же по старине и по крестному целованью. А магистру князю и его князем и арцибискупу и бискупом и их людем у псковских гостей и у купцов товару цены не уставливати, и гостинцов от того не имати, и числа ночем над псковичи не устанавливать и колодам по дорогам не быти, и гостинцов от того у псковских гостей и купцов не имати.

5. Также и магистровьм и арцибискуплим и бискуплим людем из всех городов их дръжавы в великого государя вотчину во Псковскую землю во все городы горою и водою путь чист приехати и отъехати без всякие зацепки, и купити и продати добровольно всякой товар без вывета, опричь соли. А соли немцем во Псковскую землю во все городы не возити и не торговати солью во Псковской земле. Да и корчмы немцом во Псковской земле не продавати. А псковичем с немци солью не торговати же и не возити им соли из Немецкие земли во Псковскую землю. А цены товару немецких гостей и купцов псковичем не устанавливати и гостинцов от того не имати.

6. А воску у псковских гостей немцом не колупати опроче того, что уколупив немного на опыт, да ему отдаст назад.

7. А весчее имати с товару у гостей и у купцов с пскович в Немецкой земле, а у немец во Псковской земле на обе стороны по старине.

8. А что написано в первых в перемирных грамотах великих государей Ивана божиею милостию царя и государя всеа Русии и великого князя и сына его великого государя Василья божиею милостию царя и государя всеа Русии и великого князя, которые купци псковские в местеровых городех и во арцибискуповых и во все [и] их дръжаве пойманы и товар их у них поотниман, и местеру и арцибискупу тех купцов всех отпустити со всеми их животы. А которых будут купцов в том нястве не стало, или которые ис того няства утекли, а товар их остался в местеровых городех или в арцибискуповых, или который товар псковской положен у кого в местеровых городех и в арцибискуповых, и князю местеру и арцибискупу тех купцов все животы отдати псковичем; и чево будет того товару, магистр и арцибискуп и их люди по тем перемирным грамотам в те годы псковичем не отдали, и что после того перемирья псковского посла Якова Якова Онфимова в Кеси у магистра ограбили, и тем делом всем великого государя наместнику князю псковскому и псковичем, обослався с магистром и с арцибискупом, учинити срок на съезде. А псковичем на съезде на том целовати крест, кому будет того товару чего не отдали, и магистровым людем и арцибискуплим то платити; и что у Якова у посла грабежу взято, и послу псковскому на том целовати же, что у него грабежу взято, а магистру ему заплатите.

9. А вперед в ту четырнатцать лет о обидных делех на котором городе почнетца каково дело, псковитину в местерове дръжаве и во арцибискупове дръжаве и в бискуплих дръжавах и во всей земле Лифленской, ино туто ему и управа дати по исправе и по крестному целованью не в великих делех до десяти рублев новгородцких. А выше десяти рублев будет каково дело, ино в тех делех в немецких городех в местерове дръжаве и во арцибискуплих и в бискуплих городех псковитина с немчином не судити, а дать ответчика псковитина на поруку, а по котором не будет поруки, ино его дотоле дръжати на крепости, да о том им сослатися с наместником великого государя со князем псковским и с вотчиною великого государя со Псковом. А во Псковской земле каково дело будет немчину Лифленские земли, ино также туто ему и управа дати по исправе и по крестному целованью не в великих делех до десяти рублев псковских. А выше десяти рублев каково будет дело, ино во Пскове немчина со псковитином не судити же, а дати ответчика немчина на поруку, а по котором не будет поруки, ино его дотоле дръжати на крепости, да о том великого государя наместнику князю псковскому и отчине государево Пскову сослатися с магистром да срок учинити обоим истцом с обеих сторон стати на съезде. А наместнику великого государя князю псковскому и вотчине великого государя Пскову и магистру и арцибискупу и бискупом и бергаместром и ратманом, где будет то дело во чьей дръжаве, сослати к тому сроку на съезд судей, а судьям, те дела судивши на съезде судом вопчим, да и управа им тем делом всем чинити с обыском напряме по крестному целованью.

10. А дойдет которой немчин до казни в каково деле ни буди во Псковской земле, ино его во Пскове не казнити, а сослатся о том великого государя наместнику князю псковскому с магистром, да срок учинивши, поставить того немчина на съезде перед судьями. А доидет, в какове деле ни буди, псковитин, до казни в немецких городех в магистрове дръжаве и в арцибискуплих и в бискуплих городех, и того псковитина в немецких городех также не казнити, а обослатся магистру или арцибискупу и бискупом с великого государя наместником со князем псковским и отчиною великого государя со Псковом, да срок учинивши, поставить того псковитина на съезде перед вопчими судьями, и судьи вопчие учинят тем делом конец на съезде с обыском напряме по крестному целованью. А съезду быти на том месте на межи, где буди вопчие [судьи] земле и воде рубеж учинят.

11. А взыщет псковитин на немчине, а досудят до целованья, ино целовати ответчику немчину. А взыщет немчин на псковитине, а досудят до целованья, ино целовати ответчику же псковитину.

12. А судити немчина во Псковской земле как своего псковитина. А в Немцех судити псковитина как своего немчина.

13. А знати истцу истца по своей исправе, а порубу в том не быти на обе стороны.

14. А наместнику вдовскому князя псковского и посаднику и людям добрым вдовским целовати крест на том, каково будет дело Сыренца городка магистровым людем и ругодивцом до вдовлян, и им того обыскивати и управа давати всяким делом обидным напряме по крестному целованью. Также и ругодивскому князю, и Сыренца городка князю, и судьям ругодивским и сыренским, и людям добрым крест целовати на том, каково дело будет вдовляном до сыренцких людей и до ругодивцов, в им того обыскивати и управа давати всяким делом обидным напряме по крестному целованью.

15. А татя и беглеца и холопа и робу по крестному целованью обыскав, по исправе выдати.

16. А церкви божьи русские и конци русские в местерове дръжаве и во арцибискупле и в бискуплих дръжавах, где ни буди, и те церкви божьи русские и конци русские магистру и арцибиекупу и бискупом очистити и дръжати по старине, а их не обидити. А взятое церковное отдати все чисто по крестному целованью. 

17. А в котором городе в местерове дръжаве и в арцибискуплих и в бискуплих землях у псковитина бороду выдерут, и того немчина со псковитином поставити на съезде перед судьями нa вопчем суде. А доведут на того немчипа на вопчем суде перед судьями судом и неправою, и судьям тому немчину чинити вина и казнь по суду, а порубу не быти ни в чем на обе стороны.

18. А хотя будет промеж великого государя вотчин Великого Новагорода и Пскова с Лифленскою землею и дело каково, ино в обеих сторонах, в великого государя вотчинах в Новегороде в Великом и во Пскове и во всех городех, а в Немцех в магисторе дръжаве и в арцибискуплих и в бискуплих городех и во всей земле в Лифленской, посла и гостя в том не порубати и не грабити и товару у гостей не имати, а отпускати послов и гостей со всем на обе стороны доброволно без всякие зацепки.

19. А послу псковскому и княже местерову и арцибискупову от подворья найму не платити, то отложихом на обе стороны.

20. А в ту четырнатцать лет послу псковскому путь чист горою и водою и на Ригу и на Колывань и на Ругодив и во все городы княж местеровы и арцибискуповы и во всю княж местерову дръжаву и арцибискупову приехати им и отъехати доброволно без всяких зацепок. А блюсти князю местеру и арцибискупу псковского посла на своих городех на земле и на воде как своего немчина без всякие хитрости. Также и княже местерову послу и арцибискупову по великого государя и царя русского отчине по Псковской земле и до Пскова путь чист приехати им и отъехал доброволно без всяких зацепок.

21. А о обидных делех о всяких посылати послов управы просити до трижды на обе стороны, и дадут чему управу, ино дай бог так. А не дадут в чем управы обидным делом, и тем делом срок учинити на съезде, да учинят тем делом конец судьи на съезде по крестному целованью.

22. А что по первым перемирным грамотам которым делом которые стороны конца не учинят, и псковичи с немци в том промеж себя порубалися, а имали за свое на рубеже, и вперед которым делом с которые стороны сами конца не учинят, и тем делом всем быти на съезде перед вопчими судьями. А судьям вопчим на съезде всем делом учинити конец с обыском по крестному целованью и по сей перемирной грамоте.

23. А порубу не быти ни в чем на обе стороны. А рати и войны не поды[мати] ни которою нужею на обе стороны, ни грамот перемирных в те лета не отсылати на обе стороны.

24. А старым делом всем дерть опроче дел, которые в сей перемирной грамоте писаны.

25. А се перемирье князю местеру и арцибискупу издержати крепко без всякие хитрости по крестному целованью и по сей перемирной грамоте.

26. А как отойдут се лета по сей перемирной грамоте, ино быти месяцу на обе стороны. А в том месяце рати и войны не подымати на обе стороны по крестному целованью. А послом в том месяце ездити путь чист на обе стороны по крестъному целованью. А не порубати посла ни гостя и с их товаром ни в великом деле ни в малом ни которою нужею по крестному целованью.

27. А с которые стороны не учнут правити крестного целованья, ино на того бог и крестное целованье и мор и голод и огонь и мечь.

28. А огоидут се лета и нам жити в старом миру. А коли будет нелюбовь Великому Пскову до меня князя местера и до моих князей, или мне князю местеру или моим князем коли будет нелюбовь до Великого Пскова, ино нам мир отслати, А потом, оли же месяц четыре недели пройдет, на обе стороны тоже ся воевати. А в тот месяц послу ездити на обе стороны без всякие хитрости.

А на сем перемирье и на сей перемирной грамоте руки дали и печяти свои приложили великого государя и царя русского наместники Великого Новагорода князь Данило Васильевич и Григорей Феодорович. Также великого государя царя русского наместник князь псковской князь Иван Михайлович руку дал и печять свою приложил. А посаднику псковскому степенному крест целовати и людем добрым за Псков и за все псковские городы и за всю Псковскую землю за отчину великого государя и царя русского и печять Святыя Троици приложити к сей перемирной грамоте. Также и князю местеру крест целовати и печять своя приложити за все свои городы и за всю свою дръжаву, и арцибискупу ризскому рука дати и печять своя приложити за все свои городы и за всю свою дръжаву. А на сем перемирье крест целовали послы псковские в Новегороде посадник Михаиле Юрьевич Ледов да бояре Василей Игнатьевич владычень наместник да Олексеи Михайлович старой диак городцкой и за всю Псковскую землю великого государя царя русского отчину да и печять Святыя Троицы к сей перемирной грамоте приложили. А от князя местера и арцибискупа ризского я от бискупа юрьевского и от всех бискупов, кои в сей грамоте писаны, и от все[й] Лифленские земли местеровы дръжавы на сей грамоте целовали крест послы немецкие Иван Гилдорп да мистр Иван Олдензей кенселар. А как пошлют великого государя и царя русского наместники новгородцкие своего посла ко князю местеру, ино князю местеру на сей грамоте самому крест целовати перед тем послом и за арцибискупа и за бискупов и за все свои городы и за всю свою дръжаву и печять своя князю местеру к сей грамоте привесити. А арцибискупу ризскому рука дати за всю свою дръжаву и печять своя к сей грамоте привесити. А кончяли перемирье в великого государя и царя русского отчине в Великом Новегороде в лето семь тысяч семаго на десять. И послы немецкие, которые в сей грамоте писаны, и печяти свои к сей грамоте привесили.