Пятоенадесять.

Аще кто от чуждоземцов и Русских людей при пиршестве, или во ином каковом ни буди месте, при достодолжных свидетелех, православную нашу Християнскую веру, или церковная предания хулити и укорительная каковая словеса о ней глаголати имать; и таковаго на суд во оном деле отдавати блюстителю училищ со учительми. И аще кто в хулительстве Нашея Веры, или церковных преданий во укорительных словесех по суду явится, или во отрицании призывания Святых в помощь, и святых икон поклонения и мощей святых почитания обличится; и таковый без всякаго милосердия сожжен да будет.

Шестоенадесять.

Иже в Наше православное Царствие, из иных стран приходят люди, восточныя Веры, и аще кто из оных, ради каковаго ни буди случая, оставя православную веру, и примет веру Римскую, или Лютерскую, и Калвинскую, или иную какую ересь, или кто из них будет и Римския веры, а в Наше Царствие пришед, приимет Лютерскую, или Калвинскую, или иную какую ересь; и таковый, аще истинно во оном деле обличится иже был Нашея восточныя православныя Веры, и той да сожжется; а иже был Римския веры, и той да накажется градским судом, и в ссылку да сошлется.

Седьмоенадесять.

Государственную Нашу Вивлиофику в сохранение предаем блюстителю училищ со учительми, и оной Нашей Вивлиофики при том Нашем училище вечно быти утверждаем.

Осьмоенадесять.

Строение же того училища достойым образом Акадимии Нашею Царскою казною да строится; и того хранение и о целости его промышление Наше Царскаго Величества ныне и впредь текущая времена да будет.

Сему дому туне благодать премудрости и благоразумия юным отроком, рода православнаго подавати имущему, и на пути сея жизни пищею Слова Божия и питием разсуждения во укрепление в восточной правосланой Вере, и от еретиков и всяких ересей тоя во охранение питати могущему, от Нас Великаго Государя во славу Божию, и всяких благ временных и вечных во приобретение создатися хотящему, по сему Нашему Царскому выше-изъявленному благоволению, со всеми вечными надании при совершенном и полноим чине Акадимии, иже от Нас Великаго Государя, с советом Святейшаго Патриарха, по закону святыя восточныя православно-Кафолическия Нашея Церкви востановится и утвердится, отныне во вся последствующие веки быти непременно, без всякаго препятствия и нарушения.

И таковое от Нас Великаго Государя богоугодное Церкви Божией, и Нам Великому Государю и всему Нашему Царствию полезное, и душам верным спасенное дело, Нам Великому Государю и Нашим Наследником по сему Нашему постановлению, и сею Нашею Царскою граматою утверждению, содержати во всякой целости, без всякаго изменения. И оно училище в Нашем Царском крепком охранении от всяких злоключений, нападений и бедствий, тому к разрушению, и в нем его блюстителю и учителем и учеником ко изгнанию и безчестию быти хотящих, в особном милостивом твердом защищении имети. А напасти делом и словом оных деятелей без всякаго милосердия, яко разрушителей Нашего Царскаго постаневления, Нашим Царским судом смиряти.

Аще же кто по Нас Великом Государе явится, не бояйся Бога и Церкви Божией, и православному Нашему Царствию добра не желаяй, учений ненавистник, завистник или пакостник, и яве или тай сему делу Божию препинаяй, и от Нас Великаго Государя се Наше утвержденное постановление, в чем нарушаяй, или противность сему привилегию каковую привносяй; и таковому сама Всемогущая десница Божия, премудрость местница в сем и в будущем веце да будет, и гнев Господень да поженет и во вся дни живота его, дондеже разсыпатися костем его при аде.

А во вечное утверждение сего Нашего Царскаго благоволения, постановления и укрепления повелехом ради неизмеряемыя крепости, написати сию Нашу Царскую жалованную Грамату и Нашея Царския руки подписанием, и златыя Нашея Царственныя печати приложением удостоверяти благоволихом. Писася в Царствующем Нашем преименитом и богоспасаемом граде Москве, во время мира, в лето от создания мира 7190, а от воплощения Бога Слова 1682, месяца, - в денъ – Индикта.

В том же 1682 году, Государь писал ко Вселенским Святейшим Патриархам, дабы они прислали в Москву».

История Российской иерархии. – Ч.1. – М.: Синод. тип., 1807. – С. 515-543.

Медицина.