Грамота Царя Феодора Алексеевича, регламентирующая права и назначение Академии (Спасских школ) (1682)

«Божиею милостию, Мы Великий Государь Царь и Великий Князь Феодор Алексеевич всея Великая и Малыя и Белыя Россия Самодержец ...

Того ради и Мы Великий Государь, помняще Паисия, милостиею Божиею Папы и Патриарха великаго града Александрии и судии вселенныя, и Макария, милостию Божиею Патриарха Божия града Антиохии и всего Востока, зде в Нашем царствующем граде бывших, и по согласию великославныя памяти со Отцем Нашим Великим Государем Царем и Великим Князем Алексием Михайловичем, всея Великия и Малыя и Беблыя России Самодержцем, в лето от создания мира 7176 (1668) на славу Божию разными диалекты, Греческим, Славенским и Латинским учению зде в России быти благословивших, а противящихся клятве предавших, и писанием и своих рук приписанием утвердивших; и по совету и благословению благожелательнаго во Святом Дусе отца Нашего и богомольца Святейшаго Кир Иоакима, Божиею милостию Патриарха Московскаго и всея России, подражаем онаго премудраго Царя Соломона, и древних Греческих Царей благочестивых, славу Божию размножающих, и о учении свободных мудростей имиже возмощи бы обрести разум свет души словесныя тщащихся: Константина и Феодосия великих, Юстиниана благорачительнаго, и прочих ради благолепнаго, Богу угоднаго, церкви Божией и Нам Великому Государю, и всему Нашему царствию полезнаго, и душам верных спасеннаго дела; и благоволим в Царствующем Нашем и богоспасаемом граде Москве, при монастыре премудрости и смысла подателя Всемилостиваго Спаса, иже в Китае на песках, нарицаемом Старый, на взыскание юных свободных учений мудрости, и собрания общаго ради от благочестивых и в писании Божественном благоискусных дидаскалов, изощрения разумов, храмы чином Акадимии устроити; и во оных хощем семена мудрости, то есть, науки гражданския и духовныя, наченше от Грамматики, Пиитики, Риторики, Диалектики, Философии разумительной, Естественной и Нравной даже до Богословии, учащей вещей Божественных, и совести очищения постановити.

Притом же и учению правосудия духоднаго и мирскаго, и прочим всем свободным наукам, имиже целость Акадимии, сиречь училищ, составляется, быти. И в ней всему чину Акадимическому, иже чин напишется, и Нашим Царским разсмотрением, по совету со отцем Нашим и богомольцом Святейшим Патриархом усудится, постановится и утвердится; и оному во всякой целости непорушно содержатися. Блюстителю же того дела и учителем подобающее учреждение сотворити, заповедающе всем, иже требуют ума, да приидут тамо, и ядят хлеб Слова Божия, и пиют вино разсуждения без всякаго сребродаяния туне.

И того ради во вечную онаго добропохвальнаго Нашего Царскаго дела крепость и утверждение, и от всяких еретиков и ересей православныя Нашея Восточныя веры охранение, сице царским Нашим словом, Богу Нам спомогающу, неизменно поставляем, и вечно утверждаем.

Первое.

Ради того училища вечнаго утвердительства, за основание оному незыблемое, полагаем на житие блюстителю того училища и учителем монасшырь Всемилостиваго Спаса, иже во граде Китае, близ Неглинских врат. На устроение же училищ, по чину Академии земли подле того монастыря к Неглинским вратам, в длину на […] саженей, поперег на [...] саженей. И того училища блюстителю и учителем на довольное и лепотствующее препитание, и нужных исполнение, к оному премудрости и смысла подателя, Всемилостиваго Спаса монастырю, жалуем Мы Великий Государь, придаем во вечное время; вопервых яко премудрости приличны, от него премудрости источника неизреченную мудрость небесную почерпшаго, возлюбленнаго Его ученика, Святаго Иоанна Богослова, во его имя монастырь, в Переславском уезде Рязанскаго созданный, иже нарицается Богословский, со всеми к тому монастырю прежними наддании. К оному же придаем и монастырь Андреевский близ Нашего Царствующаго града, на реке Москве стоящий. Того ради, яко той монастырь, по благоволению Отца Нашего великославныя памяти, Великаго Государя Царя и Великаго Князя Алексея Михайловича, всея Великия и Малыя и Белыя России Самодержца, создася от Нашего Царскаго Величества ближняго человека, чином Окольничаго Феодора Михайловича Ртищева, мужа, весьма всякаго блага рачительнаго, ради во оном монастыре Российскаго рода во просвещении свободных мудростей учения, дабы и оно Отца Нашего блаженныя памяти, благое и памяти достойное о свободных мудростей учении тщание, и вернаго Нашего раба благопослушное, прилежное о оном деле радение, при Нашем Царском усердном о устроении свободных мудростей учения благоволении и действом произведении вечно пребывало.

К томужде училищу да будет и монастырь Даниловский, иже на Москве реке, ради новоприходящим ученым людем пребывания; да в Московском уезде Страмынской Троицкой приписной монастырь, да в Дмитровском уезде Николаевский Песножский, да Борисоглебский монастыри, да Медведева пустыня со всеми крестьянскими и бобыльскими дворы и со всеми угодьи: да в Чугуеве на Опакове калодези наше пасечное пустое место со всеми угодьи и землею.

Таже Мы Великий Государь жалуем во вечное знамя к тому от Нас Великаго Государя хотящему устроитися училищу Нашея Царския особыя милости и милостиваго жалованья, и Нашу особую дворцовую Вышегородскую волость, в Верейском уезде со всеми крестьянскими и бобыльскими дворы и со всеми угодьи и с мельницами; да к томужде пустоши в Боровском уезде в Лавышеском стану пустошь Пашково, пустошь Зайцово, пустошь Насоново, на реке на Мелюшевке, пустошь Кочуково на реке на Суходоле, пустошь Насина на Суходолеж, пустошь Гондурово на реке на Луже, пустошь Немцово малое, пустошь Немцово Большое на реке на Луже.