МІНІСТЭРСТВА АДУКАЦЫІ РЭСПУБЛІКІ БЕЛАРУСЬ

Установа адукацыі “Гродзенскі дзяржаўны ўніверсітэт імя Янкі Купалы”

Філалагічны факультэт

Кафедра журналістыкі

Курсавая работа

Вобраз аўтара ў рэпартажы

студэнткі 3-га курсу 371 групы

спецыяльнасці «Журналістыка»

Несцер Юліі Вячаславаўны

Навуковы кіраўнік

старшы выкладчык

кафедры журналістыкі

кандыдат філалагічных навук

Герасімчык Ірына Аляксандраўна

Гродна, 2011

Змест:

Уводзіны……………………………………………………………………..…….3

Глава 1. Тэлевізійны рэпартаж: адметнасці жанру………………………….….5

1. Вызначэнне жанру. Характэрныя адметнасці рэпартажу…………….....…5

2. Паняцце “вобраз аўтара” ў структуры журналісцкага тэксту……..…......10

3. Сродкі выражэння аўтарскага “Я” ў рэпартажы ……………...……….....14

Глава 2. Выяўленне аўтарскага “я” ў тэлевізійных рэпартажах Дзмітрыя Смірнова……………………………………………………………..……….…..17

Заключэнне…………………………………………………………………….....24

Спіс літаратуры…………………………………………………………………..26

Дадатак…………………………………………………………………………..29

Уводзіны

Сярод даследчыкаў няма адзінства ў пытанні, што ўяўляе сабой рэпартаж. Адны лічаць, што гэта дынамічна напісаная інфармацыя, якая дае гледачу ўяўленне пра тую ці іншую падзею праз непасрэднае ўспрыманне журналіста. Іншыя збліжаюць рэпартаж з карэспандэнцыяй. Думкі і ацэнкі розныя, таму што рэпартаж – не кансерватыўная форма. Ён знаходзіцца ў развіцці і руху. Змяняюцца прыёмы, метады выкладу матэрыялу.

“Рэпартаж разнастайны, сінтэтычны. Галоўнае заключаецца не ў вызначэнні жанравай прыналежнасці рэпартажу, а ў вывучэнні рэпартажу ва ўсім багацці яго жанравых разнавіднасцей, індывідуальных стылістычных манер” [26, с.33]. І таму, вобраз аўтара рэпартажу - неад'емная рыса публіцыстычнай мовы, яе арганізавальны пачатак.

Гаворка кожнага чалавека валодае непаўторнай вобразнасцю. “Само сабой зразумела, што слоўныя вобразы, якія вывучаюцца ў кантэксце слоўна-мастацкай творчасці ці ў сістэме публіцыстычнага твору, могуць разглядацца або ў іх дачыненні да індывідуальнага стылю аўтара, або ў іх суадносінах да кампазіцыі асобнага тэксту, ці нават у іх суадносінах да цэлага кірунку ў развіцці пэўнага функцыянальнага стылю” [5, с.103].

Аб'ектам даследавання выступае творчая дзейнасць ўласнага карэспандэнта Першага Нацыянальнага каналу Дзмітрыя Смірнова. Прадметам дадзенага даследавання з'яўляюцца стылістычныя сродкі і прыёмы, з дапамогай якіх рэалізуецца вобраз аўтара ў тэлевізійным рэпартажы.

Мэтай курсавой работы з'яўляецца выяўленне стылістычных элементаў, якія складаюць вобраз аўтара ў рэпартажы.

У адпаведнасці з мэтай курсавога даследвання будуць вырашацца наступныя задачы:

1. азначэнне функцый і задач аўтарскага “Я” ў тэлевізійным рэпартажы.

2. выдзяленне асноўных стылістычных сродкаў, якія складаюць вобраз аўтара ў рэпартажы;

3. правядзенне стылістычнага аналізу рэпартажаў Д. Смірнова з мэтай вызначэння сродкаў выяўлення вобраза аўтара;

4. аналіз ужывання вобразных сродкаў у маўленні тэлежурналіста.

Матэрыялам для даследавання паслужылі васямнаццаць навінавых рэпартажаў Д. Смірнова, якія трансліраваліся ў перыяд з 28.09.2010 па 29. 09. 2011 года.

У працэсе даследавання намі былі выкарыстаны наступныя метады:

a) апісальны;

б) метад абагульнення і класіфікацыі;

в) дэдуктыўны і індуктыўны;

г) метад кампанентнага аналізу.

Структура работы: уводзіны, дзве главы, заключэнне, спіс выкарыстанай літаратуры і дадатак.

У першай часцы даследвання разглядаецца паняцце “вобраз аўтара” ў структуры журналісцкага тэксту, сродкі выражэння вобразу аўтара ў рэпартажы, а таксама адметнасці дадзенага тэлевізійнага жанру.

У другой часцы выяўлены сродкі прэзентацыі вобраза аўтара ў тэлевізійных рэпартажах Дзмітрыя Смірнова.