«Земное устроение» в учебном сборнике (XIV в.) «о широте и д[о]лготе Земли.

Земли растояние есть от востока даже до запада стадие 25 тем, от севера же до полудня [юга – А.Р.] 12 и пол темы. Двоице ж бо есть д[о]лгота широка, нежели широты.

О Земном устроении.

Земное устроение: Земля ни же четвероуголна есть, ни же троеуголна, ни же паки округла, ия устроена есть яйцовидным устроением. И им же образом имат яйце в вняшнем боку желчия глаголемая, извне же яду имат белта, желчь же стоит посреде, сице ми и о Земли разумей. Земле есть желчь, яйцу посреде, небо же, воздух – белта, чръка яйцу. Якоже окружает чрюпка яйцу внятрешнее, сице окружает и Землю небо и воздух; Земля же есть посреде.

И елико отстоит от Земле небо, видимое нами, толико отстоит под Землею на четырех ст[о]ран[ах], глаголя же востока и запада, и севера же и полудня: всюду же окружаема есть Земля небом – и горе, и долу, и от четырех сторон. Им же образом окружаемо есть посреднее яйцу от чрюпки его, сице и Земля окружаваема есть небом […].

Се бо видим прямо нама, яко нападый некоторый прах вреху воды многи не стоит верху, на низ падает в самое дно водам. Паче же воды д[е]ржатся в недрах Земли.[…]

Земля же носится на самой среде, яко же некое перо. Ибо колико отстоит небо от горнего лица земнаго, толико отстоит от лица долнего, и от востока и запада, и севера и полудня. И отвсюду отстоит Земля от небес и не прикасается ему.

О еже колико отстоит небо от Земли.

Отстоит же небо от Земли 36 тем поприща [… - км.], яко обходит человек, по халдеях, за 5 сот лет. Тожде отстоит небо от Земли и окрест ея. Се же сказаша звездоблюстители и землемерители.

О трясе [землетрясении – а.Р.].

Ияждно есть и о трясе ведати. Подобает же прочитающому внимати трудолюбне. И глаголем, яко Земле имат жилы воздушны, в них же входят и исходят ветры. Сия убо жилы суть внутре, в сердци Земли, престранны и широки, вверху же лица Земли суть теснейша. Прочее, напленшимся жилам Земли ветры и хотящим изыти вне ветром убо многом и великом сущем, заеже бытии им внятре, в сердци Земли, широки жилы, и пришедшее к лицу Земли, и обретше жилы тесны к лицу и не могущее изыти, и, понуждаемии, понужают земля, и смущают ея в место оно, на немже ветри случатся, и потрясается земля она. […]

О четырех стихиах.

Се показуем вам и о четырех стихиах и глаголем, яко: воздух первый инех стихиах есть, вторый же вода, третий же престь, четвертый же огнь. Воздух бо раждает воду, вода раждает прест, от прести же раждается огнь.

Есть же огнь топл и сух. Воздух сух и мокр. Вода же студена и мокра. И престь топла и мокра. Суть же престь и вода долу влекущая яко тяжчайшая. Воздух же и огнь горе влекущая яко легчайшая.

О четырех морех.

Четыре море суть в мире. И едино убо есть от …оглав, и разделяется от обрешиа Земля тоя и идет посреде Египта и Едема [южная Месопотамия – А.Р.]. Простирает же ся и идет к Индии, и разделяет Индию на полы, и достижет даже до Океанския реки, обходящия вся Земля, и на конци Индийскаго места смешается с Океаном онем.

Сие же море нарицается Чремное сего ради: престь его чремна есть, и вода его видится чремна. И сего ради Чремно наричется. […]